Eis Gerilleiru Husu Aplika Pena Todan Bá Suspeitu Oho Lemorai, Tribunal Haruka Ona Nain 2 ba ‘Hotel’ Becora

Smnewstl.com 18-10-2021 (Dili) – Eis gurilleiru Forsa Armada Libertasaun Nasionál Timor-Leste (FALINTIL) husu ba órgaun judisiál atu aplika pena ne’ebé todan bá autór ne’ebé hakotu Saudozu Celestino Boavida Ximenes ‘Lemorai’ nia vida foin lalais.

Iha komferénsia imprensa, Porta-voz, Bernardino de Cristo Fereira ‘Teki Timur’ kondena makas aktu omidísiu brutal hodi hasai veteranu saudozu Celestino Boavida Ximenes ‘Lemorai’ nia vida iha loron 14 fulan outubru iha Postu Administrativu Laga, Munisípiu Baucau.

Pozisaun ne’e aprezenta tanba konsiderado saudozu Lemorai hanesan mos eis geurilleiru ida bá luta libertasaun nasionál Timor-Leste nian.

“Ami kondena maka’as aktu omesidiu brutal ba veteranu ‘Lemoral’. Ami lasimu ema oho ita-nia maluk FALINTIL ka veteranu hanesan animal tanba, veteranu nu’udar patrimóniu sagrada estadu RDTL nian,” dehan Teki Timur liu husi komferénsia imprensa iha Fatuhada, Dili. Segunda ne’e.

Tuir Teki Timur, akontesimentu oho veteranu sira-ne’e akontese bebeik bá iha tempu pasadu, tan ne’e husu atu órgaun judisiáriu sira atu halo investigasaun kle’an, no halo julgamentu própriu, nune’e aplika pena todan hasoru autór kriminozu sira-ne’e.

“Ezemplu ida mak iha Suai ne’ebé oho ita-nia membru FALINTIL Saudozo Teki Dias. Ami husu ba órgaun judisiariu sira atu halo investigasaun profundu nojulgamentu própriu hodi aplika pena ne’ebé todan hasoru autór kriminozu sira ne’ebé habadak ona veteranu sira-nia vida ou halo violénsia hasoru sira,” lamenta Teki Timur.

Eis Guerilleiru sira mós husu Parlamentu Nasionál ho governu, atu kria lei espesífiku ida hodi valoriza no fó protesaun espesiál bá asu wa’in FALINTIL sira ne’ebé sei moris iha sosiedade nia le’et, nune’e kazu refere labele akontese tan iha futuru.

“Sé laiha forma protesaun hanesan ne’e mak ami fi’ar, katak violénsia hasoru veteranu la sei akontese tan iha futuru. Ami husu ba joven sira no públiku enjerál atu respeita no tane aas veteranu sira, tanba ho sira-nia dedikesaun no sakrifísiu mak ohin loron ita goza independénsia ida-ne’e,” apela nia.

Alem de ne’e, nia mós husu bá líder nasionál sira hanesan, Kay Rala Xanana Gusmão, José Ramos-Horta, Primeiru-Mininstru, Taur Matan Ruak, atuál Prezidente Repúbliika, Françisco Guterres ‘Lúolo’, Marí Alkatiri, Lere Anan Timur no sira seluk tan.

Atu hamutuk hodi fo atensaun sériu ba kestaun sira hanesan ne’e, tanba kuandu entidade estadu sira la fó konsiderasaun imediatu no rigorozu hasoru aktu krimi refere, maka eis membru FALINTIL sira sei foti asaun hasoru kriminozu sira.

“Ami apela ba FALINTIL no maluk rezisténsia sira iha teritóriu Timor-Leste laran tomak, atu hametin ita-nia liña komunikasaun no promove ita-nia unidade, hodi nune’e labele sai tan vítima ba aktu violentu sira,” afirma Teki Timur.

Husi sorin seluk, tuir informassun ne’ebe SMNews asesu komfirma, suspeitu rua ne’ebe diskumfia involve kazu ne’e liu husi julgamentu primeiro interogatorio iha Tribunal Distrital Dili deside hodi haruka ona ba prizaun preventiva hodi hein kontinuasaun prosesu.(ant)