Dom Virgílio: Odamatan UCT Nakloke Bá Sarani Husi Relijiaun Seluk Atu Eskola

Smnewestl.com (08-12-21) (Dili) — Archebispu Arkidioseze Metropolitana Dili, Dom Virgílio do Carmo da Silva afirma, odamatan Universidade Katólika Timorense (UCT) São João Paulo II nian nakloke bá sarani husi relijiaun seluk atu asesu bá eskola iha universidade refere.

Kuarta-Feira ne’e, Primeiru-Ministru (PM), Taur Matan Ruak ho Espoza, Isabel Ferreira, Eis Prezidente Repúblika, José Ramos-Horta no Archebispu Arkidioseze Metropolitana Dili, Dom Virgílio do Carmo da Silva hamutuk ho membru governu inklui amu sira, ofisialmente halo inaugurasaun no abertura bá UCT São João Paulo II iha Balide.

Ho inaugurasaun ne’e, Dom Virgílio afirma, UCT sei la diskriminasaun sarani sira husi mai husi relijioza seluk ne’ebé ejiste iha Timor-Leste atu asesu bá eskola iha UCT, tanba siénsia tenki loke bá ema hotu ne’ebé hakarak atu bá eskola iha UCT.

Maibé, nia afirma, UCT ne’e nu’udar universidade katólika, tan ne’e iha nia rekizitus ne’ebé iha hanesan prinsípiu universidade nian.

“Regras iha, ita hatene katak ne’e Universidade Katólika sempre iha ninia prinsípiu ninia maneira, maibé ida-ne’e ita la halo diskrimina ka ita la esklui, sé de’it mak hakarak eskola, Timoroan ne’ebé hakarak mai eskola, odamatan nakloke, atu buka matenek ha’u hanoin ita la halo diskriminasaun,” dehan Dom Virgílio do Carmo hafoin remata inaugurasaun UCT iha Balide, Dili, kuarta ne’e.

Maski líder balun preukupa kona-ba rekursu umanu ne’ebé universidade privadu sira prodús, tanba ladún iha kualidade.

Dom Virgílio do Carmo rekuiñse, kualidade rekursu umanus mós sai dezafiu ida bá UCT, tan ne’e sira prontu atu hasoru obstaklu ne’e, tanba sei hetan apoiu husi ema barak ne’ebé sei fó sira-nia kontribuisaun atu hanorin iha UCT.

“Sem dúvida ida-ne’e sai dezafius ida mós, maibé ami la’ós pesimísta, dezafiu sim, ita prontu atu hasoru dezafiu ida-ne’e, maibé ho hanoin nafatin katak, iha ema atu bele fó apoiu. Ne’ebé ami haree loos duni dezafiu iha, maibé ami optimísta katak, sei dalan atu oinsá bele enfrenta problema ida-ne’e,” subliña Bispu Dioseze Dili ne’e.

Maske nune’e, Archebispu Arkidioseze Metropolitana Dili ne’e relata tan katak, iha prosesu aprendizajen UCT nian, durante fulan 6 nia laran, sei hahú ho pre-universitáriu ne’ebé estudante sira sei aprende uluk língua Inglés ho Portugés, hafoin hakat bá materia seluk.

“Tan ne’e mak primeiru iha ne’e ami sei hahú ho buat ida bolu kursu pre-universitáriu, fulan 6 primeiru sei kursu pre-universitáriu, kuandu halo rekrutamentu husi Janeiru ga Fevereiru bá oin ne’e kursu fulan 6 ne’e ami foka liu-liu kona-ba línguas, depois ida-ne’e semester tuir mai komesa tama ona iha fakuldade sira-ne’e,” dehan nia.

Dom Virgílio haktuir, semana oin, sei konvoka enkontru entre konsellu universitáriu sira hamutuk ho kolaboradoes sira, atu bele define dekanu UCT, halo planu rekrutamentu bá estudante foun inklui ho dosente sira.

Entretantu, UCT hetan lisensiamentu husi Governu liu husi Ministériu Ensinu Superiór, Siénsia no Kultura (MESSK) iha fakuldade ha’at mak hanesan, Fakuldade Siénsia Edukasaun, Arte no Kultura, Fakuldade Siénsia Umana, Fakuldade Siénsia Médikas no Fakuldade Enjiñaria Téknika Agríkola, no mós departamentu hamutuk 20.(ant)