DNPKK-UNWOMEN, Liña Ministériu Ho Sosiedade Sivíl, Disktu Estratéjia Foun Kriasaun Rede Promove PKK

Smnewstl.com 29-09-2021 (Dili) – Sekretáriu Estadu Protesaun Sivil (SEPS) liu husi Diresaun Nasionál Konflitu Komunitaria (DNPKK) ho UNWOMEN realiza enkontru ho liña ministériu sira inklui sosiedade sivíl hodi diskuti estratéjia foun bá kriasaun rede nasionál bá promosaun Prevensaun Konflitu Komunitaria (PKK) no liga mós sensível bá jéneru iha Timor-Leste.

Diretór Jerál Protesaun Sivíl, Superintendente Xefe Ismael Babo hateten, DNPKK ho UNWOMEN konvida reprezentante husi instituisauun estadu hotu, sosiedade sivíl nasionál no parseiru internasionál sira ho objetivu atu rona sira-nia rona hanoin hodi bele kontribui prevensaun no rezolusaun konflitu iha Timor-Leste.

Superintendente Xefe Ismael Babo reforsa, durante ne’e sira implementa ona programa prevensaun konflitu komunitaria liu-liu atu promove páz no estabilidade iha Timor-Leste to’o ohin loron.

“Diskuti assuntu espesífiku haree situasuan ne’ebé akontese liu ona, haree fali estratéjia foun kria fali rede ne’ebé forte bá prevensaun konflitu komunitária iha nível nasionál to’o suku sira. Ida-ne’e mak kontribuisaun hotu ne’ebé sira sei fó durante reuniaun. Ita husu nafatin sira-nia kontribuisaun ideia par atu dezeñu fali ita-nia guiaun ida bá futuru rede nasionál ida-ne’ebé forte par prevensaun konflitu komunitária,” dehan Superintendente Xefe Ismael Babo, hafoin partisipa enkontru refere, iha otél JL Villa Fatuhada, Dili. Kuarta ohin.

Liu husi diskusaun ne’e mós, sei aprova guiaun ida-ne’ebé konsideradu importante, hodi governu bele tau konsiderasaun hanesan implementadór, tanba dadauk ne’e, ministériu interior mak lidera hela páz 1325 husi rezolusaun nasoens unidas nian.

Alem de ne’e mós, liu husi konsultasaun refere mós, bele promove liután sensível bá jéneru iha situasaun prevensaun konflitu komunitaria.

“Rede nasionál ne’e importante katak, iha koordenasaun entre liñas ministeriais entre instituisaun estadu tomak, entre sosiedade sivil, internasionál ne’ebé iha Timor-Leste hodi promove nafatin páz no establidade liu husi promosaun prevensaun konflitu komunitária no mós sensível bá jéneru iha sira ida-idak nia servisu fatin, i mós iha estadu tomak iha territóriu nasionál no mós ita-nia nível suku sira,” esplika nia.

Isamel Babo akrezenta, sensibilizasaun kona-ba promosaun prevensaun konflitu komunitaria no no mós sensível bá jéneru ne’e, sei halo mós bá estudante no mós juventude sira, nune’e sira bele iha konsiénsia hadomi sira-nai aan no evita problema hodi kontribui bá dezenvolvimentu nasionál.

SEPS liu husi DNPKK mós planu, bainhira orsamentu iha, sei koloka pontu fokál sira bá prevensaun konflitu komunitaria hahú husi munisípiu to’o iha nível suku no aldeia, nune’e bele bele sensibilidade komunidade hodi halo prevensaun konflitu komunitaria molok akontese konflitu.(ant)