Diskonfia Fasilita Movimentu Ilegál, FONGTIL Husu Komandu PNTL Demite Membru UPF

Smnewstl.com (Dili) — FONGTIL husu bá komandu Polísia Nasionál Timor-Leste (PNTL) kuandu iha indísius forte, atu imediatamente demite membru Unidade Polísia Fronteira (UPF) ida ne’ebé diskonfia fasilita sidadaun sira bá sa’e sintu iha atambua Indonézia.

“Ne’e iha buat rua, kona-ba diskonfia membru polísia UPF involve fasilita ita-nia sidadaun sira bá pasajen ilegál ne’e, tuir ita-nia hakarak mak ne’e, ita ejize ne’e mak kuandu iha investigasaun mak iha indísius forte ne’e tenki (pecat), demite kedas depois anunsiu bá públiku katak, hahalok hanesan ita-boot halo ne’e, la di’ak no respeita ita-nia instituisaun PNTL,” dehan Diretór FONGTIL, Daniel Santos do Carmo, iha komferénsia imprensa Segunda (09/08/21) FONGTIL Kaikoli, Dili.

Maneira demisaun ne’e, Diretór FONGTIL ne’e husu atu haruka membru refere deklara ofisialmente bá públiku katak, instituisaun PNTL demite ona nia..

Nune’e, bele hatudu bá membru PNTL sira seluk atu labele halo tuir hahalok ne’ebé nia halo, tanba hahalok ne’e hatudu imajen la di’ak bá instituisaun PNTL.

“Entaun tenki demite imediata bá públiku atu públiku bele hatene katak, loos duni nia maluk polísia sira mós katak, sé Ita komete aktu ida hanesan ne’e, instituisaun iha seriedade atu demite sira,” sujere nia.

Atu garante seguransa iha fronteira ne’ebé di’ak hodi labele iha pasajen ilegál, Daniel afirma tan katak, membru seguransa sira sentidu nasionalizmu ho patriotízmu.

“Estadu Timor-Leste bele tau forsa hotu-hotu iha ne’ebá, maibé sé kuandu sidadaun ne’e mak ninia naisonalista nia sidadania la’ós sidadaun di’ak ne’e problema. Entaun kazu pasajen ilegál ne’e depende bá konsiénsia hanesan sidadaun di’ak, sé sidadaun di’ak sei la halo pasajen ilegál, sidadaun di’ak sei respeita ita-nia regras sira no respeita ema seluk nia soberania,” hateten Daniel.

FONGTIL mós husu populasaun sira-ne’ebé hela besik iha fronteira, bainhira deteta sidadaun ruma halo pasajen ilegál, hato’o keixa bá PNTL, nune’e bele prosesa.

Nia mós husu sidadaun sira atu iha konsiénsia morál no mós nasionalizmu ho patriotízmu atu respeita soberania Indonézia nian labele ultrapasa ilegál, nune’e labele lori moras vírus Covid-19 hada’et bá família no ema seluk.(ant)