Diskomfia Falsifika Dokumentu Projetu Iha MOP, Tribunál Interroga Arguidu Na’in 4

Smnewstl.com 12-11-2021 (Dili) – Tribunál Distritál Dili (TDD), Sesta-feira ne’e hahú halo julgamentu primeiru interrogatóriu bá arguidu na’in 4 ne’ebé diskonfia komete iha krime falsifikasaun dokumentu iha Ministériu Obras Públikas (MOP) ligadu ho projetu balun.

Arguidu na’in 4 ne’e mak ho naran inisiál hanesan, S no AB hanesan emprezáriu husi kompañia balun, arguidu inisiál SS nu’udar funsionáriu públiku iha MOP no UPS sidadaun estranjeiru husi Indonézia nu’udar konsultor tékniku sipil.

Arguidu na’in 3 Polísia Sientífika Investigasaun Kriminál (PSIK) detein iha sela detensaun PSIK durante oras 72, hafoin submete bá primeiru interrogatóriu iha TDD.

Arguidu sira PSIK lori bá TDD iha tuku 8 ho balun dader, no julgamentu primeiru interrogatóriu hahú iha tuku 10 dader.

Inkéritu ne’e sei halao durante loron ida nia laran, tanba tribunál halo inkéritu ida-ida bá hodi rona deklarasaun husi arguidu sira.

Julgamentu primeiru interrogatóriu ne’e prezide husi juíz singulár Evangelino Belo, Ministériu Públiku reprezenta husi Prokurador Rogério Veigas no arguidu sira hetan asisténsia legál husi Advogadu Privadu Miguel Faria, Octávio.

Entretantu, iha loron Tersa-feira (09-11-21) foin lalais ne’e, PSIK, ezekuta mandadu detensaun buska no apreensaun husi TDD ho númeru NUC 00/21.PGGCC.

Hodi halo buska bá arguidu sira iha sira-nia rezidénsia, no prende mós komputador inklui dokumentu importante balun ne’ebé sai hanesan objetu krime.

Arguidu sira diskonfia komete iha krime falsifikasaun dokumentu ne’ebé previstu artigu 303 no ameasa multa iha kódiku penal Timor-Leste nian. (ant)