Deputado Antonio Benevides ho Familia Festeza Natal ho Ema ho Difisiensia, Gaspar Agradese

Smnewstl.com 28-12-2021 (Dili) – Natal hanesan momentu ba ema hotu halo refleksaun hodi husik hela buat saida mak akontese iha tinan tuan 2021,  no prepara ba simu tinan foun 2022.

Iha momentu importante ne’ebe kada familia preokupa oinsa bele hetan netik ropa diak ruma ba oan ho bei-oan sira, Antonio Benevides atual reprezentante povu iha uma fukun Parlamento Nacional ho familia deside festeza ho ema ho difisiensia sira iha nia rezidensia Auhun, Becora Dili nudar jestu fahe domin iha selebrasaun festa natal.

Ba SMNews, jerasaun potensial foinsae ne’ebe hetan fiar husi Partido PUDD ne’e rekuinese, buat ne’ebe ki’ik, maibe iha ninia signifikante bo’ot ba familia nomos ema ho difisiensia rasik oinsa bele hamutuk iha ambitu ida ba selebrasaun li-liu festa natal.

Sorin seluk, Gaspar Afonso nudar Kordenador ba defisientes senti orgulho tebes tamba bele hetan konvite hamutuk ho defisientes sira seluk husi deputado Benevides atu selebra Natal hamutuk ho Deputado Benevides ho nia familia.

Gaspar konfesa katak, involvimento Deputado Benevides nia ba fo asistensia no tau matan ba ema ho defisientes sira makas tebes molok nia sai Deputado.

“Ami agradese maske Senhor Benevides oras nee hanesan Deputado, maibe lahaluha atu tau matan nafatin mai ami. Tenik Gaspar Afonso.

Iha selebrasaun nee marka mos prezensa husi Deputada Virgina Ana Belo, Deputado Ricardo, Deputado Domingos Carvalho inklui Padre Herminio no Padre Hermenegildo Almeida. (Rio)