Delegasaun Expo Dubai la ‘Hakfodak’ ho FONGTIL

Smnewstl.com 21-10-2021 (Dili) – Xefe Delegasaun Expo Dubai atuál Ministru Koordenadór Assuntus Ekonómikus (MKAE), Joaquim Amaral deklara, sira-nia ekipa pronto bá hatán iha justisa bainhira mosu iregularidade ruma ligado ho preokupasaun publiku.

Pozisaun ne’e aprezenta hafoin fila hikas husi Dubai liu husi konferensia imprensa iha Aeroporto Internacional, Nicolao Lobato Comoro Dili, Kinta-feira ne’e

“Estadu kualker momentu prontu bá kualker situasaun, ha’u hanoin ida-ne’e mak resposta, tanba delegasaun ne’e delegasaun ofisiál partisipa iha eventu internasionál no rekoñesidu.

Executivo ne’e fundamenta, ekipa delegasaun ne’ebé kompostu husi membru governu na’in 7 prontu atu halo esplikasaun kle’an bá sosiedade sivil, kona-ba Timor-Leste nia partisipasaun iha expozisaun iha Dubai.

“Ami prontu kualker tempu atu kopera bá programa saida de’it mak sosiedade sivil presiza atu klarifika, ha’u hanoin ne’e laiha buat ida, ne’e sira-nia direitu atu hetan informasaun,”nia dehan.

Governante ne’e afirma, expozisaun Dubai 2020 sei fó benefísiu boot tanba iha Expo refere, Timor-Lesta aprezenta rikeza ne’ebé iha bá investidór internasionál sira liu husi forum business ne’ebé Timor organiza iha Uni Emirat Arab.

“Vantajen boot tebes ba Timor Leste tamba bele aproveita forum ida-ne’e hodi hatudu ninia rikeza nia potensialidade, nune’e mós oportunidade atu bele hametin relasaun komersiál, relasaun business, ligasaun ema ho ema, tanba mundu agora globalizadu nune’e kualker atividade di’ak mak sei loke dalan bá kooperasaun barak,” afirma nia.

Nia relata, durante partisipasaun iha expozisaun ne’e, ekipa delegasaun konsege halo servisu lubuk ida, konvoka enkontru bilaterál ho nasaun hamutuk 192 ne’ebé hola iha Expo Dubai inklui establerse akórdu kooperasaun ho estadu Uni Emirat Arab kona-ba Air Service Agreement (ASA).

FONGTIL rasik hato’o ona keixa ba Komisaun Anti Korupsaun tamba konsiderasaun delegasaun ne’ebe xefia husi membru governo 7 lori prezizu ba estado. Aliende ne’e FONGTIL liderado Daniel do Carmo mos propoin ba KAK atu halo kapturasaun ba membru governo 7 ho delegasaun.(ant)