Dasbach Sente Hanesan Uma Rasik Iha Prizaun Becora, ‘Xanana Kontenti’

Smnewstl.com 24-12-2021 (Dili) – Sexta-feira ne’e, Lider Nacional Kay Rala Xanana Gusmao halao vizita derepenti ba iha prizaun Becora Dili hodi observa direitamente kondisaun prizioneiro sira aumesmu tempu apoio mos nesesidades baziku balun hanesan fos, mina supermi no seluk tan.

Diretor Estabelesimentu Prizaun Becora, Joao Domingos informa, sente kontenti ho vizita Kay Rala Xanaan Gusmao ne’ebe konsidera hanesan lider nacional. Nia rekuinese, prezensa Kay Rala Xanana Gusmao sei enkoraza liu tan sidadaun sira nune’e la sente mesak durante selebrasaun festal natal ho tinan foun.

“Hau sente kontenti, tamba iha hela laran hare kondisaun prizioneiros sira, derepenti deit sira balu dehan Maun bo’ot vizita, entaun hau mos sai mai simu hodi akompanha. “Vizita ne’e mai ami sente diak tebes tamba hanesan lider nacional sei enkoraza liu tan prizioneiros sira hodi la sente mesak. Laos deit maun Xanana, maibe mos kada tinan ho Ministerio Solidariedadse Social sempre selebra natal hamutuk, ne’ebe deside ona sei halao iha loron 28 Dezembro 2021,”tenik Domingos.

Hafoin observa kondisaun prizioneiros, Xanana Gusmao mos hetan biban hodi transmite hela mensagem ba prizioneiros sira. Xanana Gusmao husu atu konsidera prizaun hanesan fatin ba halo reflesaun ba pasadu hahalok sira ne’ebe lori ona sira ba iha prizaun nune’e iha futuru labele repete tan.

“Hadia sala ne’e, ita lalika husu diskulpa, husu diskulpa lae? Hadia sala ne’e, hadia iha ita nia hahalok, ida ne’e maka hadia sala. Uluk tolok dor, fila fali ba kumprimenta ema, respeita inklui halo diak nune’e ita bele muda buat ruma nomos kurize sosiedade ne’ebe ita partensia ba,”hato’o Xanana

Termina mensagem Xanana Gusmao mos hasoru malu ho eis Padre Richard Dasbach kondenado tinan 12 Komarka ligado ho abuzo sexual hasoru orfaun sira iha Orfonato Topu Honis. Iha biban ne’e, Xanana Gusmao ho Richard Dasbach kumprimenta malu.

Ho lian Indonesia Dasbach dehan ba Xanana katak, maske foin loron hira deit, maibe sente hanesan hela iha uma rasik. “Saya disini dapat sel nomor 29 sama dengan sempo hari, jadi saya rasa seperti rumah sendiri”. Ho expresaun kontenti Xanana hata’an, “Itu Bagus”, yess”.  Konversa badak, maibe nakonu ho sentidu husi observasaun katak, durante prosesu nia laran, Xanana Gusmao sempre akompanha to’o remata.

Dasbach rasik kondenado prizaun tinan 12 Komarka husi Tribunal Distrital Oecusse iha loron 21 Outubro 2021, hafoin iha loron 22 Dezembro 2021, lori ba sulan iha prizaun Becora hamutuk ho kondenado sira seluk.

Husi Prizaun Becora, Xanana Gusmao kontinua mos apio aihan ba vitima bazeia ba jeneiru iha Balide Dili. (Rio)