Covid-19; Númeru Mate 50, Na’in 19 Seidauk Simu Vasina

Smnewstl.com 24-08-2021 (Dili) — Koordenadór pilár 7 Sala Situasaun Sentru Integradu Jestaun Krize (SIJK), Nilton do Carmo da Silva hateten, SIJK rejista ona kazu óbitu (mate) husi Covid-19 hamutuk na’in 50 ona.

Nilton informa, iha semana-rua ikus ne’e, SIJK rejista ema na’in 19 mak mate kauza husi Covid-19, no husi na’in 19 ne’e, maioria seidauk simu vasina.

“Númeru de óbitu iha ne’ebá ha’u hakerek 49, maibé ohin dadersan ita iha tan ida entaun to’o ohin ita hamutuk ona 50 óbitu, husi 50 ne’e ita haree katak, la’ós de’it ona iha vera kruz no mós Lahane, ita loron ikus ita simu mós informasaun husi Ermera no mós rejiaun Oe-cusse,” dehan Koordenadór SIJK, Nilton do Carmo, hafoin halo aprezentasaun iha Parlamentu Nasionál (PN) Tersa ohin.

Nilton informa, husi númeru kazu óbitu (mate) 50 ne’e la’ós rejista de’it iha sala izolamentu vera kruz, maibé ne’e, inklui mós munisípiu Ermera ho Rejiaun Administrativa Espesiál Oe-cusse Ambenu (RAEOA).

“Husi númeru sira-ne’e, maluk sira-ne’ebé mak mate iha semana-rua ikus ita rejistu hamutuk 19, husi 19 ne’e maioria mak seidauk hetan vasina, ita haree númeru mortalidade aas liu mak iha semana kotuk,” dehan Nilton.

Dadauk ne’e, númeru ospitalizasaun ka ema ne’ebé baixa iha sala internamentu vera kruz, no mós uza ventiladór asistida ne’ebé konsideradu kazu gráve no moderadu komesa tinan kotuk to’o agora SIJK rejista hamutuk 375.

“Númeru ospitalizasaun husi ema ne’ebé mak baixa iha sala internamentu vera kruz no mós Lahane ne’ebé sempre ami hatete katak, iha ne’ebá ita utiliza bá iha kazu sira-ne’ebé mak moderadu ou gráve ne’ebé mak presiza ita-nia atendimentu ho mákina ventiladór ou oksijéniu husi inísiu tinan kotuk bainhira ita deklara to’o ohin ita rejistu ona mais ou menus 375 pasientes,” esplika nia.

Nune’e, husi na’in 375 ne’e, iha semana-rua kotuk, SIJK rejista han pasiente hamutuk na’in 54, tanba ne’e hatudu katak, evolusaun kazu iha semana makas liu kompara ho númeru infetadu ne’ebé SIJK relata iha kada semana.

Alem de ne’e, husi 54 ne’e, husi ema barak mak seidauk vasina, no balun vasina ona, maibé seidauk kompleta bá doze daruak.

Maibé, husi pasiente 54 ne’e mós, inklui na’in 19 ne’ebé mate, no mós iha pasiente na’in 3 mak kontinua utiliza hela mákina ventiladór.(ant)