Covalima-Bobonaro Identifikado Risku Bo’ot ba Konflitu

Smnewstl.com 11-10-2021 (Dili) – Ministériu Interiór liu husi Diresaun Nasionál Prevensaun Konflitu Komunitáriu (DNPKK), pleneia atu halo rekonsiliasaun bá bairru ne’ebé iha rísku boot bá konflitu, nune’e bele kria páz no estabilidade hodi kontribui bá dezenvolvimentu nasionál.

Director DNPKK, António Viegas informa, bazeia bá relatóriu monitorizasaun ne’ebé DNPKK halo identifika, munisípiu Bobonaru ho Kovalima mak rísku bá konflitu boot liu, tanba joven sira uza hodi halo movimentu legál bá sa’e sintu iha Atambua Indonézia.

“Ami haree munisípiu. Munisípiu rísku konflitu primeiru, no mós iha fronteira Maliana ho mós Suai, ita haree iha juventude sira liga mós ho arte marsiais, mais agora komesa redús ona. Ami sei halo rekonsiliasaun bá sira, oinsá par sira bele hamutuk par kria páz, dame no estabilidade ita fó dalan bá dezenvolvimentu par la’o,” dehan Diretór DNPKK, António Veigas, hafoin halo sensibilizasaun matadalan mediasaun sensível bá jéneru bá estudante universitáriu sira iha salaun Luz Clarita, Dili. Segunda ohin.

DNPKK sei halo aproximasaun másimu hodi rezolve konflitu, ne’ebé sei hahú husi juventude sira iha Dili laran to’o iha fronteira, tanba númeru konflitu sa’e, tanba kauza husi konflitu grupu artes marsiais sira.

“Agora dadauk ami hanoin hala’o nafatin ida-ne’e uza aproximasaun másimu atu bele rezolve problema sira-ne’e, hahú iha Dili laran liga ho juventude, no mós iha fronteira ami sei rezolve, tanba agora issu ida tama sai arte marsiais, entaun ami aproxima sira oinsá par atu rezolve problema sira-ne’e,” dehan nia.

Hahú husi fulan janeiru to’o setembru, DNPKK rejista númeru konflitu lubun ida iha territóriu nasionál, maibé barak liu mak iha Dili laran mak hanesan, Kuluhun, Becora, no Bebonuk to’o iha Comoro, fatin hirak ne’e mak nia númeru konflitu boot liu.

Entretantu, Ministériu Interiór liu husi Sekretáriu Estadu Protesaun Sivíl no DNPKK, ne’ebé estabelese atu prevene no halo mediasaun ba konflitus iha nível komunidade iha territóriu Timor laran tomak, nune’e bele kria páz no estabilidade hodi konsentra bá iha dezenvolvimentu nasionál.(ant)