Coliati Preukupa TNI Asegura Kilat 100 Iha Fronteira

Smnewstl.com 06-09-21 (Dili) — Xefe Estadu Maiór Jenerál Forsas Armadas, Brigadeiru Jenerál Calisto dos Santos ‘Coliati’ preukupa ho Tentata Nasionál Indonézia (TNI) asegura kilat hamutuk 100 iha fronteira terrestre entre Timor-Leste ho Indonézia.

Kilat 100 ho tipu AESE92 ne’ebé forsa TNI asegura ne’e, tanba diskonfia kilat anin hirak ne’e ema atu lori tama mai Timor-Leste, maibé la konsege.

“Ita-boot sira rasik haree, TNI amankan (asegura) kilat ne’e 100, signifika katak, liu husi 100 ne’e iha ona Timor-Leste, ne’e tanba saida.? Tanba forsas armandas maka laiha kapasidade atu garante seguransa, ou lei mak la forte atu bele garante seguransa iha rai ida-ne’e,” dehan Brigedeiru Jenerál Coliati hafoin partisipa iha KROP iha ministériu finansas, Segunda ohin.

Brigadeiru Jenerál ne’e mós lamenta, tanba saida poder polítiku sira labele koloka membru Falintil Forsa Defeza Timor-Leste (F-FDTL) labele halo seguransa iha fronteira.

Tanba nia hatutan, forsas armadas merese duni atu fó seguransa iha fronteira, la’ós polísia, tanba realidade hatudu, Unidade Polísia Fronteira (UPF) mak fó segurans afali, enkuantu F-FDTL seguransa iha rai laran.

“Ida-ne’e ita-boot sira husu bá polítiku sira, polítiku sira mak hatene, tanba saida mak militár ne’ebé merese atu garante seguransa iha fronteira tau iha laran par deposi iha ne’e tuku lor-loron, depois tau polísia mak iha ne’ebá, ida-ne’e presiza husu bá polítiku sira, sé arma tama husu bá polítiku sira, sira mak hatene, tanba saida ma arma sira tama mai,” dehan nia.

Antes ne’e mós, Primeiru-Ministru, Taur Matan Ruak deklara, nia fó ona orden bá Vise-Ministru Interiór, António Armindo ho Ministru Defeza, Filomeno Paixão halo diskusaun, nune’e bele koloka ona F-FDTL iha fronteira.(ant)