Smnewstl.com (01-12-2021) Xefe Estado Maior Jeneral Forcas Armadas, Brigadeiro Jeneral Calisto Santos ‘Coliati’ deklara, militar sempre kumprimenta ba orden, tamba ne’e pronto simu desizaun ligado ho rotasaun ka ezonerasaun.
“Ami militar ne’e kumpri orden, ne’ebe ema dehan tun, tun ona, sae, sae ona hanesan haktuir liafuan bahasa karik dehan, siap komandan,”haktuir Coliati ba Smnews via telefone hodi hata’an ba proposta husi Primeiro Ministro Taur Matan Ruak ho Ministro Defesa, Filomeno Paixao de Jesus kona ba ezonerasaun no nomeasaun Xefe Estadu-Maiór Forsas Armadas (KEMFA), no Komandante Komponente F-FDTL sira.
Xefe Estado Maior Jeneral ne’e rekuinese, rona fali novidades ne’e husi ema, parese transmite ba nia hafoin akompanha publikasaun iha media. Nia parte hanesan mensiona iha leten katak, kumpri deit desizaun.
Hata’an kona ba proposta governo karik rotasaun ou ezonerasaun, Coliati sublinha, ba ida ne’e so komfirma ho Ministerio Defesa ho Konselho Ministro. “Hau hanoin, ita bo’ot sir abele halo komfirmasaun direta ba iha Konselho Ministro ou Ministerio Defesa, so sira mak bele fo resposta. Hau mos la hatene ida, hau rona fali deit maluk sira kala le’e iha media maka telefone hau, ne’ebe hau mos dehan, ami militar ne’e hanesan ne’e deit, kumpri orden,”haktuir Coliati.
Nia fundamenta, hirarkia militar mak hanesan hau haktuir ona, dehan tun, tun ona, dehan sae, sae. “Hau hanesan ema ida laos militar deit, maibe milutar ida liu husi akademia militar. Hau escola iha Australia, Amerika no seluk tan, ne’ebe hau hasai hau nia kursu militar, hau hatene. Militar mak ida ne’e, orden, ema dehan pronto, siap.
Entretantu tuir komunikadu ne’ebe Smnews asesu komfirma, reuniaun Konselho MInistro Kuarta-feira ne’e, iha Palacio Governo Dili aprova projeitu deliberasaun no ezonerasaun kona ba Xefe Estado Maior Forcas Armada inklui komandante komponente Falintil Forcas Defesa Timoro Leste sira.
Tuir komunikado ne’e dehan, projetu deliberasaun aprezenta husi Primeiru-Ministru Taur Matan Ruak, hamutuk ho Ministru Defeza, Filomeno da Paixão de Jesus, kona-ba ezonerasaun no nomeasaun Xefe Estadu-Maiór Forsas Armadas (KEMFA), no Komandante Komponente F-FDTL sira no Proposta refere sei submete ba aprovasaun husi Prezidente Repúblika.(ant)
Komentariu