CEO BNCTL : Papel Banco Atu Asegura Kreximentu Ekonómiku no Dezenvolvimentu Ekonomia Sustentável

Smnewestl.com 11-12-21 (Dili) — CEO Banku Naisonál Komérsiu Timor-Leste (BNCTL), Brígido de Sousa, Sabado ne’e fahe informasaun bá formandus sira husi sentru formasaun Eiros kona-ba papel importante sira-nian iha dezenvolvimentu kreximentu ekonómiku ne’ebé sustentável.

Brígido esplika, papel jerál banku hotu-hotu hanesan de’it, tanba servisu banku nian atu mobiliza depózitu husi kliente sira, no mós fó fali kréditu bá kliente atu halo negósiu no seluk tan hodi kontribui bá hasa’e kreximentu ekonómiku ne’ebé sustentável hodi kontribui bá prosesu dezenvolvimentu nasionál.

“Ohin hau ko’alia kona-ba banku sira-ne’e nia papel prinsipál iha asegura dezenvolvimentu no kreximentu ekonomia ne’e oinsá.? No mós esplika saida mak akontese iha ita-nia rain Timor, no ha’u hanesan reprezenta BNCTL ko’alia mós kona-ba saida mak BNCTL halo ne’ebé la ses husi papel banku nian,” dehan Brígido de Sousa bainhira sai Oradór bá semináriu ne’ebé realiza husi Sentru formasaun Eis liu husi departamentu Computer Banking and Financial ho tópiku ‘Influénsia Sistema Bankária bá Ekonomia Nasionál no Globál, iha Mandarin Dili.

Nia hatutan, papel banku nian atu influénsia hodi asegura kreximentu ekonómiku no dezenvolvimentu ekonomia ne’ebé sustentável liu, liu husi mobilizasaun depózitu no fó kréditu banku nian bá konsultivu ou setór privadu sira hodi haburas kreximentu ekonomia.

Jerente Operasionál Eiros, Filipe de Sousa Soares konsidera, semináriu ne’e importante, tanba bele konvida CEO BNCTL atu partilla informasaun sira kona-ba papel banku sira-nian liu-liu BNCTL iha prosesu dezenvolvimentu ekonomia ne’ebé sustentável liu bá formandus sira atu bele hatene.

Nia hatutan, semináriu ne’e, nudar faze ida iha prosesu aprendizajen Eiros nian liu-liu bá formandus sira husi departamentu Computer Banking and Financial.

“Ohin ami halo semináriu ami konvida ami-nia parseiru husi BNCTL señór Brígido hanesan oradór ne’ebé ohin mai hato’o informasaun kona-ba papel banku nasionál iha Timor-Leste liu-liu BNCTL, ida-ne’e parte hanesan prosesu aprendizajen mós bá ami-nia formadus sira,” dehan Jerente Operasionál Eiros, Filipe de Sousa, iha Eiros Mandarin, Dili, sábdu ne’e.

Filipe de Sousa relata, alem de fahe informasaun bá formandus sira iha Eiros, maibé importante mós bá públiku atu bele hatene kona-ba lala’ok servisu banku sira-nian.

“Informasaun ida-ne’e mós ami hakarak partilla bá públiku tomak katak, papel saida mak banku ne’e halo bá dezenvolvimentu nasionál, tanba ne’e, hanesan sentru formasaun, ida-ne’e ami-nia responsabilidade mós hakarak bá públiku katak, iha Timor-Leste ita-nia prosesu tomak la’o di’ak duni, soke buat balun ladún di’ak, mais ida-ne’e ita-nia responsável par ita bele hadi’a,” tenik Jerente ne’e. (ant)