CCF Férias, Lere ho Apoiantes Adia Foti Kartaun Militante FRETILIN

Smnewstl.com 01-02-2022 (Dili) — Tuir agenda, Tersa-feira ne’e iha oras 16.00 OTL membru Komité Sentrál FRETILIN (CCF sigla Portugés) segunda jerasaun, Lere Anan Timur akompanha husi apoiantes sei bá foti kartaun militante FRETILIN iha CCF, maibé ligado ho ferias ámbitu komemorasaun loron Xineza ne’ebe monu iha 1 Fevereiro no mos transformasaun FALINTIL ba FDTL  maka deside hodi adia hikas fali ba Kinta-feira, 03-02-2022.

Terseira Vise Koordenadór Ekipa Susesu bá kandidatura Prezidente Repúblika, Tenente Jenerál reformadu Lere Anan Timur, Sandra Tilman hateten, loloos Tersa-feira ohin, maibé tanba feriadu, nune’e adi’a fali bá Kinta-feira, 3 Feveriro 2022.

“Ohin férias loron Xina nian no aban férias tranformasaun FALINTIL ba FDTL, ne’ebé komu CCF taka hela, entaun muda fali ba Kinta-feira, oras tuku 4 lokoraik,”informa Sandra Tilman, bá Smnewstl via telefóne, Tersa ne’e.

Sandra Tilman dehan, Sekretariadu Ekipa Susesu Kandidatura PR, Lere Anan Timur hasoru ona Sekretáriu Jerál Adjuntu FRETILIN, Flávio, nune’e konfirmadu ona, Jenerál reformadu Lere sei ba foti ninia kartaun militante FRETILIN iha Kinta-feira.

“Ohin ekipa ida tun ona bá hasoru ona membru ida iha ne’ebá (CCF), señór Flávio konfirma ona, dia 3 oras tuku 4, maibé señór Flávio sei nafatin konfirma ho Sekretáriu Jerál (FRETILIN, Marí Alkatiri),” dehan nia.

Kona-ba organizasaun Santu António ne’ebé fó apoiu bá kandidatu PR, Lere Anan Timur, ne’ebé sujere bá Sekretariadu Ekipa Susesu, atu realiza komferénsia extra-ordináriu, atu bele deside estatutu Lere nian molok fila bá uma tuan FRETILIN.

“Provizoriamente buat hotu-hotu seidauk aberta, pur-enkuantu fila tiha husi Ainaru mak ita foin haree buat ne’e la’o oinsá,” subliña nia.

Entretantu, Prezidente Repúblika (PR), Francisco Guterres Lú-olo ezonera Xefe Estadu Maiór Jenerál Forsas Armandas, Tenente Jenerál reformadu Lere Anan Timur iha loron 28 fulan Janeiru 2022, hafoin simu proposta ezonerasaun husi governu no mós rona hanoin husi Konsellu Superiór Defeza no Seguransa.(ant)