Casal Difisiente Iha Foho Lolon Becora Ne’ebe La Imagina Hetan Uma Husi Xanana

Smnewstl.com-(Dili)- Moris ho kondisaun fiziku saudavel ba ita sente kontenti tamba hateke buat hotu fasil.

Se’e iha familia ida mak moris ho kondisaun difisiensia, maibe iha harmonia nia laran ba ita sente orgulho tamba la barak hanesan ita imagina.

Situasaun moris ne’e refleta ba casal ida iha foho lolon Aldeia Kakeu Laran, Suco Becora, Posto Administrativo Cristo Rei, Municipio Dili.

Alarico Mendounca (56), sidadaun ho difisiensia iha ain tamba hetan tiru husi militar Indonesia iha tinan 1999, enkuanto Anita dos Santos 56, difisiensia iha matan desde kedas sente mundo ne’e nia roman.

Kondisaun fiziku la sai obstaklu ba kazal ne’e atu hean hasoru laloran moris ne’ebe nakonu ho dejafiu maske vulneravel tebes.

Aliende susar ba aihan, kazal ne’e mos moris iha uma ne’ebe la favoravel tebes. Kondisaun uma tonka deit ho besi, uma nia lolon hafutar deit ho koak. Iha tempu udan, sira ses an husi sikun ida ba sikun seluk.

Moris ho kondisaun volnueravel deit la to’o basa casal ne’e infrenta mos problema iha vida moris lor-loron nian.

Ida be sofre difisiensensia iha matan hare servisu ba uma laran lor-loron nian, enkuanto ida be’e difisiensia iha ain mos nafatin asume responsabilidade tuir kbi’it.

Maromak hatene haraik, maromak mos hatene fo moris. Basa maske difisiesia iha ain, maibe iha talentu rasik ba haknauk osan rahun liu husi koa banin be’en.

Hader husi taka matan deskansa kalan nian seidauk kaer ba matabisu, aman idade avansada nee kontinua kedas foti nia kamiza ho nesesidades hanesan Balde, tali inklui tali tahan hafalun ho kulu lao ain husi hela fatin to’o fali fatin ne’ebe banin iha ba.

Banin nia ben midar no sabor inklui iha funsaun barak, maibe atu hetan nia ben mos la fasil. Presiza prepara mentalidade diak, fiziku hodi hakat sae hali leten hafoin bele hasai.

Situasaun ne’ebe konsiderado defisil, maibe ba Alarico hanesan servisu bai-bain ona tamba liu husi nee maka bele haknauk osan rahun ba sustenta moris.

Moris ho kondisaun vulneravel laos sai kestaun, importante maka la lakon esperansa basa tuir sira laiha ema bele deskobre planu maromak nian.

Husi esperansa ne’e ikus mai haraik ba sira situasaun ne’ebe la imagina atu hetan nakfilak hanesan mehi bainhira hetan vizita derepenti husi defensor ba kiak no mukit, Kay Rala Xanana Gusmao iha sira nia Bairo.

Lakoi husik le’et oportunidade, Anita hakbesik a’an buka meius oinsa bele kumprimenta ho intensaun laos atu hakerik susar ho terus, maibe hakarak hare no kaer rasik liman basa konsiderado Xanana hanesan mahon ba timor.

Hanesan lider ne’ebe mai kedas husi kiak no mukit, Xanana sente saida maka inan Anita sente hodi orienta kedas nia seguransa pesoal ba identifika nune’e fo apoio.

Hanesan baibain, Xanana mobiliza kedas timoroan ne’ebe hamahan a’an iha grupu X kompostu husi Ferik, Katuas, foinsae feto no mane voluntariemente konstroi uma ba casal ne’e.

Servisu nia lao ho durasaun semana ida resin. La hare ba loron, la hare kalan, importante maka servisu ho laran mos, neon mos ajuda hirak ne’ebe presiza basa hamutuk ho Xanana Gusmao sempre iha solusaun ba problema ba povu nian.

Triste kahur kontenti bainhira simu save uma odamatan husi Kay Rala Xanana Gusmao hafoin hetan bensaun husi Amo Roberto Cosat, svd Culuhun.

Ba Xanana Gusmao Casal nee dehan, laiha murak mean atu fo, maibe hasae nune’e aman maromak nafatin haraik vida naruk atu kontinua hatutan misaun ba liberta povu tuir prinsipiu luta ba libertasaun patria ne’ebe ohin loron ema hotu goja.

Informasaun ne’e atu relembra ba ita katak, ita ema nia prezensa iha mundo temporario deit. Buat saida maka ita hetan hanesan grasa ida husi maromak.

Fahe ba buat ne’ebe ita hetan basa lolo liman sei la halo ita monu ba kiak. Liu husi lolo loman maka ita sei hetan grasa barak liu husi nai maromak.

Parabens ba aman Alarico Mendounca e Parabens inan Anita dos Santos. Agradese wain ba ita nia laran luak Avo Nana. Agradese e Agradese.