Cárceres ‘Hakfodak’, Akordo Arrendamentu ho Pelican Paradise Vise MJ Edmundo Asina tia Ona

Smnewstl.com 05-01-22 (Dili) — Ministru Justisa (MJ), Manuel Cárceres deklara, nia parte laiha kuiñesimentu ba kontratu arrendamentu rai iha akórdu espesiál investimentu entre governu Timor-Leste ho Pelican Paradise ne’ebé asina iha loron 3 Janeiru 2022.

Akórdu espesiál investimentu entre governu Timor-Leste ho Pelican Paradise asina husi Ministru Prezidente Prezidénsia Konsellu Ministru, Fidélis Magalhães, Ministru Koordenadór Asusntus Ekonómikus (MKAE), Joaquim Amaral no Vise MJ, José Edmundo Caetano.

Akórdu refere iha parte rua ne’ebe parte dahuluk asina husi Ministru MKAE, Joaquim Amaral kona-ba Akórdu Espesiál Investimentu Pelican Paradise, enkuantu Vise-Ministru Justisa, José Edmundo Caetano asina kona-ba arrendamentu bá rai nian, ne’ebe nia superior Cárcerese laiha kuinesimentu.Bá akórdu ne’e, Ministru Justisa, Manuel Cárceres dehan, nia sente hakfodak ho asinatura akórdu ne’e, tanba nia rasik ho Primeiru-Ministru (PM), Taur Matan Ruak mós la    partisipa.

“Ha’u mós hakfodak fali, depois ha’u mós la bá ida, Primeiru-Ministru mós la bá, ne’ebé bá husu bá sira-ne’ebé asina de’it, ha’u labele fó resposta tanba Ministru la asina,” dehan Ministru Justisa, Manuel Cárceres, iha Palásiu Governu, Kuarta ne’e.

Manuel Cárceres hatutan, Ministru Justisa la partisipa iha asinatura akórdu espesiál investimentu ho Pelican Paradise ne’e, tanba la konkorda bá klauza balun iha akórdu refere.

“Tanba ha’u la konkorda ho saida mak hakerek iha kontratu arrendamentu ne’e, parte barak, hakerek ho Portugés ha’u ko’alia ho Portugés imi la komprende. Tanba lei. Lahatene bá husu bá sira-ne’ebé asina, kontratu arrendamentu ne’e só Ministru Justisa mak bele asina ne’e tuir lei, iha rajaun tanba lei, lei haruka ita la’o, lei mós haruka ita para,” subliña nia.

Manuel Cárceres afirma, akórdu ne’ebé Vise-Ministru Justisa, José Edmundo Caetano asina ho Pelican Paradise kona-ba arrendamentu rai ne’e, la reprezenta Ministru Justisa.

Tanba tuir, tuir lei orgánika oitavu governu konstitusionál no mós lei orgánika Ministériu Justisa nian, la fó kompeténsia bá Vise-Ministru ho Sekretáriu Estadu atu asina akórdu arrendamentu bá rai.

“La Reprezentanta ha’u ida, tanba tuir orgánika oitavu governu ne’e, iha Justisa Vise-Ministru ho Sekretáriu Estadu laiha kompeténsia, kompeténsia ne’e tenki-ser delega husi Ministru, ne’ebé la reprezenta Ministru ida, ha’u dia 3 de Janeiru tur iha ha’u-nia Gabinete to’o tuku 5 lokraik,” deklara Manuel Cárceres.

Maibé Manuel Cárceres dehan, loron rua ka tolu tan, sei fó solusaun bá Xefe Governu, Taur Matan Ruak, tuir dekretu-lei n°.19/2004 kona-ba kompeténsia asina akórdu arrendamentu no afetasaun bá sasán estadu nian.

“Ha’u sei fó solusaun bá Suaexelénsia Primeiru-Ministru dekretu-lei n°.19/2004 fó kompeténsia bá sé kona-ba arrendamentu ho afetasaun sasán estadu nian, depois haree iha orgánika oitavu governu konstitusionál nian hatete saida iha ne’ebá, depois haree iha orgánika Ministériu Justisa hatete saida iha ne’ebá,” tenik nia.

Governante ne’e deklara tan katak, nia lakoi atu ko’alia kona-ba akórdu espesiál investimentu ho Pelican Paradise ne’e, tanba ne’e la’ós nia kompeténsia.

Maibé, hakarak foka liu bá asinatura kontratu arrendamentu bá rai nian, ne’ebé sé mak iha kompeténsia tomak atu asina, tuir lei orgánika oitavu governu nian no mós lei orgánika Ministériu Justisa nian.(ant)