Brigadeiru Jenerál Coliati Anunsia Bá Públiku Naran Kadetes Foun F-FDTL

Smnewstl.com 15-09-2021 (Dili) — Xefe Estadu Maiór Forsa Armanda, Brigadeiru Jenerál Calisto dos Santos ‘Coliati’ anunsia Kuarta-Feira ohin, lista naran bá kadetes foun FALINTIL Forsa Defeza Timor-Leste (F-FDTL) hamutuk na’in 600 ne’ebé pasa ona iha teste.

Liu husi Komferénsia imprensa, Brigadeiru Jenerál Calisto dos Reis ‘Coliati’ informa, komisaun rekrutamentu finaliza ona prosesu sira, tanba ne’e publika ona naran kadetes foun F-FDTL ne’ebé konsideradu pasa ona atu bele inkorpora iha instituisaun F-FDTL.

“Ohin 15 de Setembru 2021 komisaun rekrutamentu ofisialmente publika kadetes no rekruta ne’ebé konsidera liu iha teste hodi bele mai inkorpora iha das FALINTIL F-FDTL. Komisaun joven feto no mane ne’ebé iha fulan rua bá kotuk mai tuir ona teste ou ezame médika, psikotékniku no eskrita, orál no fízika iha sentru instrusaun komandante Metinaro, bele hakbesk-aan bá iha ida-idak nia munisípiu hodi haree ita-boot sira-nia naran,” dehan Brigadeiru Jenerál Coliati.

Tanba ne’e, hahú ohin, komisaun rekrutamentu lori ona lista naran bá taka iha administrasaun munisípiu, Komandu Polísia Munisípiu 12 inklui rejiaun Oe-cusse Ambenu, no sede konsellu veteranus iha munisípiu atu nune’e, kandidatu sira bele bá haree sira-nia naran.

“Bá kadetes no rekruta ne’ebé pasa, tenki mai aprezenta aan imediata tuir munisípiu hodi rona orientasaun, loron kuarta 22 Setembru 2021 oras tuku 9 fatin kuartel jenerál F-FDTL Fatuhada. Bá sira-ne’ebé sei mai aprezenta aan iha dia 22 Setembru ne’e husi munisípiu Dili, Likisá, Bobonaru, Ermera, Aileu, Manatuto no Baucau,” esplika Coliati.

Nia hatutan, bá kadetes sira husi Munisípiu hanesan, Lautém, Viqueque, Manufahi, Ainaru, Covalima, Oe-cusse no kadetes husi rejime espesiál sira, tenki bá aprezenta aan iha kuartel jenerál F-FDTL Fatuhada iha dia 23 fulan Setembru 2021 iha tuku 9 dader.

Brigadeiru Jenerál ne’e afirma, objetivu husi aprezenta aan ne’e, atu rona orientasaun husi komisaun rekrutamentu, tanba dala atu tama iha sentru instrusaun Metinaro, iha loron 27 fulan Setembru tinan 2021 iha tuku 9 dader, aranka ona bá Metinaro.

“Bá sira-ne’ebé la marka prezensa tuir data loron no oras ne’ebé determina ona, komisaun rekrutamentu sei elimina. Rekomenda mós bá kadetes sira, husi Munisípiu ne’ebé dok, tenki mai hela ona iha Dili, par hein to’o data inkorporasaun bá iha sentru instrusaun Metinaro, data inkorporasaun ne’e mak dia 27 de Setembru 9 oras aranka ona husi kuartel jenerál Fatuhada bá Metinaro,” tenki nia.

Maibé husu kadetes foun sira, pelo menos tenki simu ona vasina doze primeiru, molok bá aprezenta aan iha kuartel jenerál, no mós tenki halo tuir regras protokolu Covid-19 ne’ebé Ministériu Saúde ho organizasaun mundiál saúde haruka.

Bá sira-ne’ebé la pasa, Coliati husu atu labele triste, maibé prepara saúde, nune’e bele aplika iha fali iha tinan 2022.(ant)