Smnewstl.com – Governu Brazíl reafirma sira nia kooperasaun bileterál hodi kontinua apoiua kapasita profesór Timoroan sira no apoia área medikamentu nian.
Kometimentu ne’e hato’o hosi Embaixadór Brazíl ba Timor-Leste, Maurício Medeiros Assis durante hasoru malu ho S.E. Sr. Primeiru-Ministru, Kay Rala Xanana Gusmão, iha Palasiu Governu Dili.
“Ha’u mai hasoru malu ho senhor Primeiru-Ministru, Kay Rala Xanana Gusmão ami ko’alia kona-ba posibilidade Timor-Leste no Brazíl halo kooperasaun iha área edukasaun, kooperasaun ida ne’e Brazíl iha tiha ona apoia ba área ne’e iha programa apoia formasaun ba profesór sira, ne’ebé Primeiru-Ministru husu atu kontinua programa sira ne’e hodi ajuda Governu Timor-Leste,” informa Embaixador Maurício.
Durante ne’e, Governu Brazíl fó ona apoiu ba Timor-Leste iha área formasaun ba profesór sira, mediku, no agrikultura no área seluk tan maka kapasitasaun membru FALINTIL Forsa Defeza Timor-Leste (F-FDTL).
“Ami-rua primeiru-ministru mós ko’alia uitoan kona-ba agrikultura, nomós programa importante ida Brazíl nian, hanesan agrikultura no pekuaria, Timor-Leste mós hanesan, setór agrikultura nu’udar setór prioridade governu nian”, nia hatete.
Iha área edukasaun nian, Governu Brazíl fó oportunidade ba juventude hamutuk -300 liu maka hala’o estudu ba área oin-oin iha universidade sira iha Brazil.
Fatin hanesan, Primeiru-Ministru Kay Rala Xanana Gusmão agradese no husu ba Governu Brazíl atu kontinua apoia programa prioridade hirak ne’e tuir politika governu nian.(Smnews)
Komentariu