Bosok Trata Dokumentu bá Servisu Iha Inglaterra, Ema Nain 4 Sai Vitima no Lakon $ 4,100

Smnewstl.com 26-01-2022 (Dili) — Polísia Nasionál Timor-Leste (PNTL) ne’ebé destakadu iha Aeroportu Internasionál Prezidente Nicolau Lobato hamutuk ho Unidade Patrullamentu Fronteira (UPF) no Eskuádra Dom Aleixo detein suspeita ida ho inisiál ANM, tanba diskumfia bosok sidadaun na’in 4 hodi trata dokumentu atu bá servisu iha Inglaterra ne’ebé kada ema hatama osan montante rihun $ 1025 dólar nune’e ho total hamutuk $ 4,100.

PNTL destakadu Aeroportu, UPF no eskuádra Dom Aleixo, kaptura suspeitu ANM iha tuku 3 lokraik, iha Aeroportu Internasionál Prezidente Nicolau Lobato, bainhira lori vítima na’in 4 ne’ebé akompaña vítima sira atu aranka bá reinu unidu.

Oras ne’e daduak, suspeitu ANM detein ona iha sela detensaun Polísia Eskuádra Dom Aleixo durante oras 72 hodi aprezenta bá primeiru interrogatóriu iha Tribunál Distritál Dili.

Vítima Noel Araújo dos Reis hateten, suspeitu ANM haruka sira tama dokumentu hanesan sertidaun RDTL, sertidaun batízmu, sertidaun batízmu inan-aman nian ho osan dólar $ 25 hodi rejístu.

Maibé, suspeitu ANM haruka vítima sira hatama tan osan dólar $ 200 atu trata dokumentu hanesan, Billete Identidade (BI) Portugál passaporte Timor, passaporte Portugál inklui narativa.

“Depois ida-ne’e ami prepara tan osan $ 800 bá sosa tiketi, maibé nia prosesu tiketi ne’e ami husu tuir mós la fó ami-nia tiketi, passaporte mós hanesan ami husu mós nia la fó ami ka’er, nia dehan katak, imi bá de’it to’o iha Aeroportu mak ha’u-nia tiun ne’e entrega ita sa’e ita bá ona,” dehan Vítima, Noel Araújo dos Reis bá Smnewstl iha Eskuádra Polísia Dom Aleixo Aimutin, Dili, kuarta ne’e.

Noel Araújo dos Reis hatutan, suspeitu ANM promete bá sira atu aranka husi Timor-Leste bá Inglaterra iha Kuarta-Feira ohin, maibé to’o Aeroportu Comoro iha tuku 3 lokraik aviaun semo hotu ona sira seidauk aranka, tanba ne’e hahú mosu problema.

“Ohin 26 Janeiru 2022 ne’e tuku 3 ami atu sai husi Timor, to’o iha ne’ebá komesa problema, aviaun sai primeiru la’ós, bá segundu mós la’ós, dehan orsida tuku 3 mak ita sai, tuku 3 la jadi sai maka família balun komesa diskonfia ona kaptura nia iha Aeroportu,” subliña nia.

Nia dehan, durante ne’e sira husu ajénsia nia naran bá suspeita ANM, maibé suspeitu la deklara.

Maibé dehan, suspeitu ne’e nia tiun ne’ebé sai nu’udar sponsor servisu iha Timor, enkuantu nia tian servisu iha Embaixada Timor-Leste nian iha Portugál, nune’e halo vítima sira fi’ar hodi hatama osan bá nia atu trata dokumentu.

Tanba ne’e, Noel Araújo dos Reis husu atu entrega fila-fali sira-nia osan hamutuk rihun $ 1025 ne’e bá ema ida-idak, maibé kontinua prosesa bá Tribunál, tanba ne’e krime.

“Nia tenki-ser fó fali osan, depois nia tenki-ser responsável bá nia hahalok ne’e tuir lei ne’ebé mak iha,” dehan nia.

Entretantu, vítima na’in 4 ne’e mak hanesan, Noel Araújo dos Reis, Jaime Soares, Pedro Ximenes no Avelino Fátima.

Entretantu, hafoin kaptura suspeitu ANM, PNTL asegura mós evidénsia hanesan, motor beat mutin ida-ne’ebé suspeitu uza bá hala’o atividade, telemóvel, no mós osan iha suspeitu nia karteira hamutuk dólar $ 590.(ant)