BOP-COE Kaptura Tan Joven Nain 11 Iha Saburai, Tenta Ultrapasa Ffonteira ba Sae Sabuk Iha Indonesia

SMNewstl.com (Dili)-Tuir informasaun ne’ebe asesu liu husi Pagina Relasaun Publika,Ministerio Interior komfirma katak, Komandu Polísia Nasionál Timor-Leste (PNTL) liuhusi Unidade Batallaun Ordem Publika (BOP) no Companhia Operasional Polísia (COE) kaptura tan sidadaun timoroan na’in 11 ne’ebé tenta hakat ilegal fronteira terestre hodi ba Indonézia

Komandante UEP, Superintendente Xefi Polisia Orlando Gomes deklara, sidadaun hirak ne’e PNTL kaptura liuhusi operasaun konjunta iha fronteira terrestre Timor-Leste ho Indonézia.

“Ohin tuku tolu dadersan madrugada ita nia membru UEP ne’ebe lidera hosi Komandante BOP rasik Inspetor Rosalino do Santos no komandante ekipa COE Inpetor asistente Julio Bosco halo operasaun konjunta hodi kaptura tan joven nain 11 iha Suku Saburai, Postu Administrativu Maliana, Munisipiu Bobonaro inklui sidadaun Indonezia ida ho naran inisial AM no membru UPF nian ida ne’ebe mai hasoru sira hodi fasilita tama ilegalmente ba Indonezia hodi sae sabuk”, informa Orlando, liu hosi telefone, sabadu ne’e.

Nia dehan, sidadaun timor oan sira nia viajen ba Indonezia ne’e ilegal tanba Guvernu dekreta hela Estadu Emerjensia, bandu no taka ona fronteira terestre.

“Maske dadaun ne’e Munisipiu Bobonaro sai ona hosi Serka Sanitaria Guvernu nafatin aplika Estadu Emerjensia hodi halo prevensaun ba Surtu Covid-19 maibe joven sira kontinua hakat fronteira ho ilegalmente hodi ba sa’e sabuk iha Indonezia”

Orlando hateten, kona-ba asuntu fronteira UEP sei reforsa efetivus balu hodi apoiu UPF no FALINTIL-Forsa Defeza Timor-Leste aperta fronteira terestre.

Nia afirma, PNTL sei foti medida ba membru Grupu Arte Marsiais sira ne’e hodi prosesa tuir lei ne’ebe vigor iha ita nia nasaun.

“Membru arte marsiais ne’ebe ohin hetan kapturasaun ita sei halo identifikasaun no entrega ba ekipa saúde COVID-19 hodi kumpri kuarentena hafoin sei hetan investigasaun hosi Koordenasaun Ofisiál Ligasaun Forsa Tarefa (sigla portuges; COLFT) no ikus liu ba entrega ba Ministeriu Publik hodi prosesa tuir lei”, nia esplika.(**)