Bisoi: ‘Key Xavier Lori Esperansa Foun Mai Hau’, Jornalista Sai Mata Dalan

Smnewstl.com 14-02-2020 (Betano) – Premiadu Nobel da Paz, José Ramos Horta Emprezariu Timoroan, Key Xavier hamutuk ho autoridade selebra loron valentine day hodi oferta prezente uma furak ida ba Inan Feton Kbiit Laek, Joana Camoes “Bisoi” iha Aldeia Sisurai, Suku Betano, Postu Same-Vila, Munisipiu Manufahi.

Joana Camoes “Bisoi” ema ho difisiensia ne’ebe tinan barak moris mesak no hala’o de’it atividade liu husi foti Ailele produs ba Sumasu hodi fa’an fila fali ba hetan osan.

Uma ne’ebe oferese ho medida 5×6 ho kuarta rua, sala vizita ida, salah han fatin ida kompleta ho fasilidade, toba fatin, armariu, kadeira no meza inklui dapur, enrega ho serimónia bensaun hosi Padre Vigariu Parokia Nossasenhora Asunção Same, Fernando da Silva.

Kbiit Laek, Joana Camoes “Bisoi” ho matawen hato’o agradese tebes, tanba uma ne’e sai ona mahon no naromak ba nian hela ho dignu. “Ha’u agradese ba Maun Key hodi tulun ona ha’u halo uma ne’e, ha’u foin sente hetan naroman ida, hodi halo ha’u kontente ho tanis hodi simu uma ida ne’e,” tenik ho matawen iha Aldeia, Sisurai-Same, segunda (14/02/22).

Nu’udar umanu, Joana Camoes selu Key nia ajuda labele, maibé sei hasa’e orasaun ba Na’I Maromak hodi fó bensaun no kbiit liután ba Key Xavier hodi hatutan nia domin ba hirak ne’ebé presiza tebes.

Premiadu Nobel da Paz, José Ramos Horta Emprezariu Timoroan, Key Xavier foto hamutuk ho Inan Feton Kbiit Laek, Joana Camoes “Bisoi” iha Aldeia Sisurai, Suku Betano, Postu Same-Vila, Munisipiu Manufahi. Imajen/Epesiál.

Iha fatin hanesan, Premiadu Nobel da Paz, José Ramos Horta ne’ebé sai sasin ba serimónia importante ne’e, hato’o parabéns ba Key Xavier hodi lolo liman ba povu kbiit laek sira.

“Ha’u agradese ba Key Xavier ho nia familia sira hodi halo asaun ne’e, nu’udar modelu ida ita tenki halo tuir, tanba asaun importante tebes, tanba iha tinan 2020 Key ho Maun Boot Xanana no Timoroan barak ajuda ona ema barak iha Timor laran tomak,” dehan Horta.

Horta dehan, durante fulan Maiu 2020, Maun Boot Xanana ho emprezariu Timoroan no empezariu Xineza sira entrega fahe mós foos kuaze rihun-10 liu ho ekipamentu desportu Timoroan sira iha munisipiu hotu-hotu.

Eis Prezidente Republika ne’e (2007-2012) ne’e promete sei kontinua dere embaixador dezignado iha Timor-Leste atu halo mós asaun tulun ne’e kbiit laek sira.

Entretantu, Diretór Kompañia Badfor Lda, Key Xavier konsidera asaun karidade halo uma ba kbiit laek sira nu’udar kontinuasaun hosi programa “LOLO LIMAN BA KBIIT LAEK NE’EBÉ PRESIZA” sira ne’ebé hala’o antes ona hamutuk ho Lider Istóriku, Kay Rala Xanana Gusmão iha tinan 2020 sei kontinua too agora.

Key halo uma ne’e, hafoin hetan informasaun hosi jornalista sira ne’ebé publika lalauk moris inan feton ne’e iha media.

“Ha’u haree jornalista sira aprezenta inan ne’e nia problema, tanba ne’e ha’u mai haree direita ajuda tuir ha’u nia kbiit,” nia hatete.

Key konsidera papél jornalista importante mós, tanba la’ós hala’o de’it atividade koberutra ba situasaun politika, maibé halo mós kobertura ba asuntu sosiál ne’ebé ne’ebé liga problema sosiál povu nian.

“Ha’u nia fuan triste tebes, bainhira ha’u mai haree Tia Bisoi nia uma, nia moris susar tebes, iha tempu ne’ebé, ha’u hanoin tebes hodi buka mai hadia kedas uma ne’e no ohin ita hamutuk mai entrega kedas uma ne’e loron domin ho ne’ebé ema hotu iha mundu tomak no ita Timor-Leste mós selebra ho Avó José Ramos Horta liu hosi entrega uma ne’e,” nia hatete.

Key agradese mós ba autoridade suku, juventude no komunidade ne’ebé apoiu servisu kontrusaun uma ne’e too remata. Diretór Kompañia ne’e promete sei kontinua hatutan programa lolo liman ba kbiit laek sei kontinua hatutan nafatin.

Entretantu, Adjuntu Administradór Munisipiu Manufahi, Filomeno Amaral, apresia ho asaun karitiativa ne’ebé hala’o mós iha loron importante ne’ebé mundu tomak no povu Timor-Leste selebra loron domin nian.

“Uma dignu ida ne’e, nu’udar onra ho solok tebes, tanba ami agradese ba Maun Ramos Horta no Maun Key hodi oferece uma ida ne’e. Key Xavier ema ne’ebé hatudu nia domin no laran luak, ami hatene Key halo ona uma barak iha fatin barak, ne’e tanba domin ne’ebé boot tebes mai hosi nia neon no laran,” nia agradese.

Nia dehan, Key ajuda ema ne’ebé presiza nu’udar asaun importante hodi kari domin ba hirak ne’ebé presiza tebes.

“Key oferese uma ne’e, tanba nia domin no nia fuan, hodi hatudu matan ba nia hodi oferese uma ne’e, ami espera maluk emprezariu sira seluk atu hatuan ba kbiiit laek sira ne’ebé presiza,” autoridade ne’e agradese.

Nia dehan, iha Manufahi, Governu liu hosi Programa Dezenvolvimentu Nasionál Suku (PDNS) mós prepara ona osan toku $4 hodi halo uma kbiit laek ba povu sira ne’ebé autoridae Manufahi identifika ona.

Parte seluk, Xefe Suku Betanu, Filipe de Araújo, hato’o agradese ba Avó Jose Ramos Horta no Timoroan Key Xavier hodi entrega uma ne’e ba nia populasaun.

Autoridade suku ne’e, espera emprezariu Timoran sira ne’ebé iha kbiit bele hatutan programa ne’e iha Manufahi tomak hodi ajuda povu sai hosi mukit.

“Ha’u agradese ba prezente ida ne’e, liu-liu ba ama Bisoi ne’ebé hetan prezente uma ne’ebé dignu ba ita boot atu hela ho dignu, nu’udar servidor ami husu agradese ba Aman Maromak atu fó bensaun ba maun Key nia atividade hodi halo nafatin asaun kridade ba ita nia komunidade ne’ebé moris iha susar nia laran no agradese mós ba prezensa Avo Ramos Horta hodi hola parte iha atividade simples ida ne’e,” nia agradese.

Xefe suku ne’e mós, apresia, Avo Ramos Horta bele halo mós dialogu ho komunidade sira hodi rona direita sira nia preokuapasaun kona-ba problema bee moos, edukasaun, saúde no problema sosiál seluk ne’ebé tinan barak kesi metin povu nia moris.

Dialogu no Rona Preokupasaun Povu Sesurai

Hafoin entrega uma, Premiadu Nobel da Paz, José Ramos Horta mós halo kedas dialogu ho komunidade Aldeia Sesurai ne’ebé preokupa bee mota sempre sobu bebeik komunidade sira nia hela fatin, bainhira udan onu rai.

Komunidade sira hosu atu kandidatu presiza ne’e koordena ho governu sentral hodi rezolve mós problema sosiál asesu ba bee moos, edukasaun, saúde no seluk tan.

Serimónia ne’e, valentine day no dialogu ho komunidade ne’e, partisipa direita hosi Komandante PNTL Munisipiu Manufahi, Superintendente Xefe, Joni Viana das Regras, Reprezentante Komandu F-FDTL, Xefe Suku Betanu, Filipe de Araújo no komunidade sira. (Rio)