Autoridade Seguransa Kaptura AC Iha Hotel Ida Iha Oecusse

Smnewstl.com (Dili) – Polisia Nasionál Timor-Leste (PNTL) liu husi servisu Investigasaun Kriminal ejekuta mandadu buska no aprensaun ba AC ligadu ba kazu Topu-Honis iha Oe-Kusi Ambeno, ne’ebe diskumfia envolve eis Padre Dasbach.

Informasaunne’ebé Sm asesu Smnewstl husi fontes balun iha Oecusse komfirma katak, AC kapturado iha Hotel Gratidão ne’ebé lokaliza iha Oe-Bau, Oe-Kusi Ambeno. Ekipa Servisu Investigasaun Kriminal kompostu husi ema nain 6, ne’ebe tama ba área hotel ne’e iha oras tuku 10 dadersan, hafoin kontinua tama ba AC nia kuartu laran hodi asegura sasan hanesan lap top Acer ida ho telemovél.

“Polisia mai dadersan de’it, sira mai direitamente tama ba maun AC nia kuartu foti tiha nia sasan balun hanesan lap top no telemovel depois tau aljema iha nia liman. Agora sira sai tiha ona husi fatin ne’e, no ami lahatene lori nia ba ne’ebé karik,”Informa fontes ne’e.

AC rasik tuir informasaun, durante ne’e sempre akompaña vitima detensaun illegal no vitima visum obrigatoriu ba labarik feto sira ho idade menor besik nain 30 husi uma mahon Topu-Honis inklui prosesu julgamentu la’o iha Tribunal Oe-Kusi Ambeno.

Tuir informasaun ne’ebé SMNews asesu mos komfirma, ekipa polisia investigasaun kriminal nsei transporta AC husi Oe-Kusi Ambeno ba Dili hodi tuir prosesu inkeritu iha kuartel jeral PNTL iha Kaikoli.

To’o informasaun ne’e fo sai parte PNTL seidauk aprezenta pozisaun ruma ligado ho kapturasaun ba AC. (**)