Autoridade Protesaun Sivíl Sei Hasai Komunidade Ne’ebé Hela Iha Área Rísku Dezastre

Smnewstl.com 13-12-21 (Dili) — Maske lei Protesaun Sivíl aprovadu iha Parlamentu Nasionál (PN) no promulga ona husi Prezidente Repúblika (PR), maibé seidauk bele implementa, tanba presiza tan lei orgánika kona-ba kriasaun Autoridade Protesaun Sivíl (APS).

Diretór Jerál Protesaun Sivíl Sekretáriu Estadu Protesaun Sivíl (SEPS), Ismael Babo hateten, Kuarta-Feira semana ne’e, Ministériu Interiór no SEPS sei aprezenta lei orgánika Autoridade Protesaun Sivíl bá Konsellu Ministru atu hetan aprovasaun.

“Lei orgánika Protesaun Sivíl kuandu estabelese ona, Autoridade ne’e sei impoin bazeia bá lei Protesaun Sivíl dekretu-lei n°.7 Autoridade ne’e sei bá halo fiskalizasaun, impoin disiplina bá sidadaun hotu par labele halo uma iha fatin rísku bá dezastre,” dehan Superintendente Ismael Babo iha knár fatin SEPS Kaikoli, Dili, segunda ne’e.

Ismael Babo esplika, bainhira estabelese ona Autoridade Protesaun Sivíl, maka sei fiskaliza komunidade ne’ebé halo uma iha Área rísku dezastre, nune’e informa atu muda bá fatin seguru, atu labele kauza tan ema mate husi dezastre naturais bainhira uza monu rai.

Tan ne’e, kuandu komunidade sira la obdese bá lei, maka protesaun sivil sei halo partisipasaun bá Ministériu Públiku hodi aprezenta bá Tribunál, nune’e halo despezu administrativu obrigatoriamente bá sira.

“Sé sira la halo tuir, protesaun sivil sei halo partisipasaun bá sidadaun ne’ebé de’it mak la obdese bá lei, ita halo partisipasaun aprezenta bá Ministériu Públiku lori Tribunál depois hasai desizaun despezu administrativu obrigatoriamente ita hasai ho forsa, par evita ona ema labele halo uma iha mota laran, foho lolon, tasi ninin, bee laran par ita labele lakon tan vida,” subliña nia.

Alem de atu evita ema lakon vida, atu evita mós estadu labele gasta osan milliaun bá milliaun hodi apoiu rekoperasaun bá material konstrusaun bá vítima dezastre naturais.

Ismael Babo relata, SEPS kontinua halo sosializasaun espesifiku kona-ba lei Protesaun Sivíl bá komunidade sira-ne’ebé hela iha área rísku dezastre, hodi informa bá komunidade, bainhira forma ona APS sei halo identifikasaun bá sira.

Tanba dekretu-lei n°.7 artigu 9 la fó dalan bá protesaun sivil atu fó apoiu material konstrusaun bá vítima ne’ebé hakarak halo uma fatuk rísku bá dezastre.(ant)