Smnewstl.com 13-10-2021 (Dili) – Polísia Nasionál Timor-Leste (PNTL) liu husi polísia tránzitu parte tráfiku investigasaun, halo ona investigasaun bá asidente ne’ebé akontese iha Hera Hali Dólar ne’ebé involve Biskota diresaun Dili-Lospalos ho motorizada ida ho diresaun Baucau-Dili.
Asidente ne’e akontese horikalan (Tersa-feira), maizumenus tuku 8 ho balun. Bus nebe involve iha asidente ho naran Watusera, Sapa Matrikula 36-763, enkuanto motorizada ho marka Honda Beat ho xapatríkula M 9901.
Komandante Polísia Tránzitu Nasionál, Inspetór Domingos Sarmento Gama informa, asidente ne’e, rezulta vítima ne’ebé uza motorizada ho naran kompletu, Antoninho Soares Gusmão evakua kedas bá Ospitál Naisonál Guidu Valadares (HNGV), maibé labele salva vida.
Enkuantu, polísia eskuadra posto Hera mós asegura kedas suspeitu ho inisiál LP ne’ebé hanesan mós kondutór Bus Uatu-sera, nune’e bele kontinua bá prosesu investigasaun hodi bele hatene nia kauza.
“Asidente iha Hera iha parte Hali Dólar purvolta tuku 8 ho balun hanesan ne’e akontese asidente ne’e. Asidente ne’e involve entre transporte públiku biskota diresaun Dili-Lospalos ho Lospalos-Dili ho motorizada ida, kondutor motorizada ne’e gráve konsege lori bá HNGV mais la konsege salva vida, tuir informasaun to’o iha ospitál otas 3, 4 hanesan ne’e mak foin hakotu iis iha HNGV,” dehan Inspetór Domingos Sarmento Gama, iha postu tránzitu Bairru-Pite, Dili. Kuarta ohin.
Inspetór Domingos Gama esplika, motivu husi asidente ne’e, biskota husi diresaun Dili bá Lospalos, enkuantu motorizada husi parte Baucau mai Dili, nune’e akontese asidente iha Hera.
Maibé, parte polísia sei buka hela testamuña atu fó deklarasaun bá tráfiku investigasaun polísia tránzitu.
“Motivu husi asidente ne’e agora daduak ita foin foti hela informasaun balun parte rua, ita buka hela testamuña balun par atu kompleta motivu asidente ne’e, mais tanba kalan, entaun buka testamuña balun par atu mai reforsa motivu asidente ne’e, tuir informasaun biskota ne’e husi Dili bá Lospalos, motorizada ne’e husi parte leste mai Dili,” subliña nia.
Oras ne’e dadauk, polísia tránzitu asegura ona, kondutor biskota no mós evidénsia hanesan biskota ho motorizada atu bele foti deklarasaun hodi aprezenta auto-notísia bá Ministériu Públiku.(ant)
Komentariu