Arsenio Bano :Sosiedade Komersiál Mak Reprezenta RAEOA Sosa Ró Success

Smnewstl.com 09-12-21(Dili) – Prezidente Autoridade Rejiaun Administrativa Espesiál Oe-cusse Ambenu no Zona Espesiál Ekonomia Sosiál Merkadu Timor-Leste (RAEOA-ZEESM-TL), Arsénio Bano klarifika, empreza sosiedade komersiál mak reprezenta Autoridade RAEOA 30% hamutuk kompañia privadu Irmão Timor 70% mak sósiu sosa ró ahi Success.

“Ró ne’e negosiasaun la’o nafatin Autoridade RAEOA ne’e sé mak reprezenta sosiedade komersiál empreza públika autoridade nian, autoridade Oe-cusse haree sira negosia objetivu ne’e bá interese Oe-cusse nian, ami hakarak tinan ne’e remata tinan oin solusaun bá transporte marítima iha,” dehan Arsénio Bano iha Parlamentu Nasionál (PN), kinta ne’e.

Arsérnio Bano klarifika tan katak, prosesu akizasaun bá ró refere, Autoridade RAEOA laiha interese seluk no la viola lei ruma, tanba interese Autoridade nian mak rezoolve problema transporte marítima bá povu Oe-cusse.

Foto Agensia TATOLI,TP 

“Balun hatete dehan, iha dúvidas bá partisipasaun ekonómika ne’e, Prezidente Autoridade Oe-cusse, ami laiha interese iha partisipasaun, ami-nia interese ida de’it ró ne’e tenki iha dia rua bá povu Oe-cusse atu la’o bá mai. Buat hotu-hotu ne’e tenki la’o ho regra, osan ne’e la’ós ema ida nian, osan ne’e estadu nian, povu nian la’o tuir regras, negosiasaun rasik la’ós ha’u mak halo, ne’e entre empreza sira mak halo,” dehan nia.

Tan ne’e, empreza sosiedade komersiál reprezenta Autoridade hodi partisipa iha prosesu negosiasaun no akizasaun ró Success ne’e ho 30%, enkuantu kompañia Irmão Timor 70%.

“Orsamentu ne’e sira mak negosia, sira mak hatene, hato’o mai Autoridade ne’e 30% bá partisipasaun husi empreza ne’ebé mak reprezenta Autoridade 70% ne’e privadu nian, ne’e mak loos, jestaun privadu mak di’ak liu, tanba ami hakarak hadi’a atendimentu bá ami-nia populasaun,” klarifika nia.

Oras ne’e dadauk, Autoridade RAEOA ho kompañia Ataúro Express estabelese akórdu kooperasaun, nune’e ró Ataúro Express nian bele halo operasaun mós bá RAEOA.

Tan ne’e bá Arsénio Bano, di’ak liu fó bá empreza sosiedade komersiál ne’ebé reprezent Autoridade RAEOA mak sósiu ho empreza Irmão Timor hodi ssoa ró refere, nune’e tinan oin 2022 labele ho transporte marítima Dili Oe-cusse hodi fasilidade populasaun sira bá-mai.(ant)