Armanda Berta Garante Stock Ai-han Bá Populasaun Munisípiu Ermera

Smnewstl.com (Dili) — Vise Primeira-Ministra no Ministra Solidariedade Sosiál no Inkluzaun (MSSI), Armanda Berta dos Santos hateten, governu garante nafatin stock ai-han nesessidade bázika bá populasaun sira iha munisípiu Ermera ne’ebé aplika hela serka sanitária iha postu Railaku no Ermera.

Governu aplika serka sanitária iha postu Railaku no Ermera, tanba númeru kazu pozitivu aumenta, maibé ezekutivu mós nafatin garante stock ai-han bá populasaun sira, nune’e labele hasoru krize hamlaha.

“Iha munisípiu Ermera ita haree bá postu rua de’it iha suku rua mak iha hela serka, tanba ita haree bá kazu ne’e hanesan tun sa’e, entaun ita haree de’it Dili Ermera ho Dili, maibé ita nafatin fó apoiu kona-ba asaun sosiál nian,” dehan Vise PM no MSSI, Armanda Berta dos Santos, kinta (19/08/21) iha salaun MSSI Kaikoli, Dili.

Armanda Berta afirma, MSSI establese ona ninia diresaun sira iha munisípiu 12 inklui Rejiaun Administrativa Espesiál Oe-cusse Ambenu (RAEOA), nune’e presiza apoiu nesesidade báziku la presiza mai to’o iha nasionál.

“Sentru sira ita halo hotu iha munisípiu sira, sira presiza ruma kona-ba assuntu sosiais sira bele koordena Diretór sentru sira par atu bele fó apoiu mós, tanba ministériu ninia diresaun sira to’o kedas munisípiu, entaun ita haree kona-ba ai-han buat sira-ne’e hotu, ita koloka kedas bá iha 12 par sira presiza ajuda ruma husi governu, sira bele atende, la presiza halai to’o mai nasionál,” subliña nia.

Governante ne’e hatutan, durante ne’e MSSI sempre fó apoiu bá ema hirak ne’ebé presiza tebes apoiu husi governu nian.(ant)