Arguido ba Kazu Insestu no Oho Oan Hakiak Iha Comoro Simu Tinan Foun Iha ‘Hotel’ Becora

Smnewstl.com 28-12-21 (Dili) — Tribunal Distrital Dili (TDD) liu husi julgamentu primeiru interrogatóriu aplika medida koasaun prizaun preventiva bá arguidu VS, komete violasaun seksuál hasoru nia oan intiada ka oan hakiak (anak tiri) ho tinan 11, iha Aldeia Moris Foun, Suco Comoro Dili. Razaun aplika medida koasaun prizaun preventiva tanba, iha indísiu forte ne’ebé arguidu komete.

Ministériu Públiku imputa arguidu bá krime rua mak hanesan krime aktu seksuál agravadu bá menor no omisídiu simples ne’ebé previstu iha artigu 177 no 139 hotu-hotu iha kódiku penál Timor-Leste. Hafoin de Tribunál aplika medida koasaun ne’e, Polísia lori arguidu ba prizaun Becora.

Entretantu, krime violasaun seksuál bá menor no krime omisídiu simples ne’ebé arguidu VS komete iha loron 20 fulan Dezembru tinan 2021 iha área ponte Comoro 3.

Hafoin akontese, arguidu deside ilegalmente ultarapasa Fronteira Terestre bá Kupang Indonézia, maibe la to’o oras 72, Polres (Sigla Indonesia, Kepolisian Resort) Kupang halo kedas kapturasaun iha rezidensia familiar iha area Kupang Timur ne’ebe partense ba Polres Baubau nune’e nune’e iha loron 25 fulan Dezembru 2021, entrega hikas mai Migrasaun Timor Leste hodi responsabiliza ba aktu krime ne’ebe komete.

Primeiru interogatoriu ne’e prezidi husi juiza singulár, Maria Solana, Ministériu Públiku reprezenta husi Prokuradór, António Tavares no arguidu hetan asisténsia legál husi Defensor Públiku, Jonas Henrique.(ant)