APORTIL Kontinua Hein Pareser Legál Husi KAK-MP Atu Selu Ró Tranship II

Smnewstl.com 06-09-21 (Dili) — To’o oras ne’e, Autoridade Portuáriu Timor-Leste (APORTILA) seidauk halo pagamentu bá ró Tranship II, tanba seidauk iha parser legal no jurídika ruma husi Komisaun Anti Korrupsaun (KAK) no mós Ministériu Públiku.

Prezidente Konsellu Administrasaun APORTIL, Flávio Cardoso Neves konfirma, dokumentu atu halo pagamentu bá ró Tranship II kompletu ona, maibé labele realiza lai pagamentu, tanba seidauk hetan pareser ruma husi órgaun judisiáriu sira.

Maibé iha parte seluk, governu presiza halo pagamentu duni, tanba ró Tranship II halo kumpre ona nia knar halo operasaun Dili, Oe-cusse no Ataúro durante fulan-rua juñu ho jullu.

“Ita seidauk selu osan ida bá iha kompañia, mais iha parte seluk mós kompañia halo ona nia knar operasaun durante fulan-rua, tanba ne’e mak agora saida mak ita halo, primeiru prosesu ne’e tama ona iha prosesu judisiál, APORTIL atu halo asaun kona-ba pagamentu tenki hetan rekomendasaun pareser husi KAK ou pareser Ministériu Públiku atu bele halo pagamentu, tanba ha’u mós ha’u-nia staff sira kona prosesu ruma bá sira,” dehan Prezidente APORTIL, Flávio Neves, Segunda ohin.

Nia hatutan, iha ona dokumentu nesessáriu sira ne’ebé atu haruka bá ministériu finansas hodi halo pagamentu kompletu ona, maibé liu husi buska no apreensauun KAK foti dokumentu refere, tanba ne’e APORTIL labele selu.

“Antes bá finansas sentrál presiza prienxe hotu rekizitus finansas bele hetan aprova halo pagamentu, ezemplu kontratu, relatóriu depois ikus liu mak nia invoice, rekizitus kompañia hatama hotu ona ita dehan, kompletu, mais prosesu ne’e tama ona iha prosesu investigasaun, depois halo asaun tiha ona, depois dokumentu barak mak KAK foti hotu ona, entaun APORTIL laiha buat ida, hein de’it pareser husi KAK Ministériu Públiku APORTIL halo asaun bá pagamentu,” esplika nia.

Entretantu, governu liu husi Ministériu Transporte Komunikasaun (MTK), aluga ró transship II durante fulan-rua fulan juñu ho jullu hamutuk rihun $ 220.(ant)