APORTIL-DNTM Sei Solusaun Problemas Pasajeirus Dili-Oe-cusse no Ataúro Durante Finadu

Smnewstl.com 20-10-2021 (Dili) – Autoridade Portuáriu Timor-Leste (APORTIL) ho Diresaun Nasionál Transporte Marítima (DNTM) sei halo koordenasaun atu garante nafatin konektividade transprte marítima bá pasajeirus Oe-cusse no Ataúru durante iha tempu finadu no mós natál no tinan foun.

Prezidente APORTIL, Flávio Cardoso Neves hateten, iha opsaun rua mak sai alternativu bá APORTIL ho DNTM bele opta, atu bele asegura konektividade transprte marítima liu-liu iha tempu finadu ho fim do ano 2021, tanba finadu ho fim do ano ne’e iha movimentu boot bá Oe-cusse no Ataúro.

“Ita só iha rekursu rua de’it, Ataúro Express ho Bintang Samudra 8 ne’e mak ita iha, agora hanusa mak ita bele uza rekursu ne’ebé mak iha atu bele garante movimentu Ataúro Oe-cusse ne’e bele la’o di’ak iha tempu finadu depois ita atu tama ona iha fim do ano ida-ne’e movimentu makas. Tanba ne’e, APORTIL servisu hamutuk ho DNTM atu buka solusaun atu bele fó alternativa iha tempu ne’ebé ita enfrenta,” informa Prezidente APORTIL, Flávio Cardoso Neves, bá Smnewstl iha nia knaar fatin Portu, Dili. Kuarta ne’e.

Ezekutivu ne’e afirma, opsaun rua ne’e mak, APORTIL ho DNTM sei uza ró Ataúro Express ho ró Bintang Samudra 8 iha situasaun difísil ne’e, tanba ró rua ne’e mak hanesan rekursu másimu ne’ebé autoridade rua ne’e iha atu asegura konektividade transprte marítima entre Oe-cusse no Ataúro.

APORTIL ho DNTM mós sei kria mekanízmu kontrolu ne’ebé di’ak, liu-liu atu kontrola ekipamentu seguransa vida pasajeirus sira-nian, kria fatin ne’ebé seguru bá pasajeirus sira durante viajen, tanba ró Bintang Samudra 8 espesífiku bá tula kargo de’it la’ós ró pasajeirus nian.

“Depois Samudra tula ema karik, ita prepara kondisaun ne’ebé di’ak, pur-ezemplu kuandu pasajeirus sira sa’e ró refere ita tenki prepara kondisaun minimál nia tenki tur, minimál mahoben labele kona, sé ida-ne’e mak ita bele halo ona, opsaun ida primeiru ne’e ita bele realiza bá iha ne’ebá. Ida-ne’e mak ami tenta hela atu garante nafatin konektividade iha tempu ida ita enfrenta mai ne’e, finadu ho fim do ano, sambil ita hein ita-nia ró foun ne’e atu bele mai karik espera nia bele mai tuir tempu ne’ebé determinadu ona,” realsa Flávio.

Tan ne’e, posibilidade ró Ataúro Express semana oin hahú ona halo operasaun bá Oe-cusse no Ataúro, maibé, sei la tula liu kapasidade ró nian, tanba ró refere nia mákina ki’ik.

“Ezemplu Ataúro Express komesa semana oin nia bele halo ninia atividade, maibé nia tenki-ser tuir rekomendasaun ne’ebé DNTM, sé nia tula pasajeirus karik labele liu, pur-ezemplu nia iha posibilidade tula pasajeirus 300, ita rekomenda bá sira katak, sira bele tula de’it 150, tanba haree bá aspetu tékniku rekomendasaun husi DNTM ró ne’e nia mákina ki’ik liu, entaun nia bele tula de’it 150, maibé ekipamentu salva vida mós tenki-ser kompletu,” subliña nia.

Alem de ne’e, APORTIL ho DNTM mós loke oportunidade bá parseiru ne’ebé durante ne’e halo negósiu iha área marítima nian, bainhira disponibilidade hakarak hatama ró tula pasajeirus nian mai Timor-Leste, nune’e bele garante nafatin movimentu via marítima durante finadu ho natál no tinan foun.(ant)