Apoio Xanana ba Vitima Insendiu Kontinua To’o Tan Iha Mercado Comoro

Smnewstl.com-Insediu ne’ebe akontese iha loron 29 Julho 2021, husik hela trauma no sofrementu bo’ot ba uma kain atus ida resin iha Eis Mercado Comoro.

Iha vizita dahuluk hodi lori apoio baziku hanesan fos, mina, manta, lona no seluk tan, Lider Nacional Kay Rala Xanana Gusmao mos simu pedido eskrita husi vitima sira.

Sexta feira, 30-07-2021, hafoin remata limpeza ba sasan hira ne’ebe ahi han inklui mobiliza Kamioneta tula sai foer iha oras dadersan to’o meudia, Xanana fila ba kompra tuir pedido ne’ebe nia parte simu.

Hare ba tempu ne’ebe la premiti (kalan ona) atu lori sasan hirak ne’e ba tereinu, Xanana deside iha oras tuku hitu dadersan ho kalsa badak, faru metan derepenti deit to’o iha vitima sira nia le’et.

Prezensa Eis Lider Rezistensia ne’e tuir vitima, lori haksolok no esperansa ba sira hodi la sente mesak durante hasoru situasaun defisil.

Sasan hirak ne’ebe lori tuir pedido ne’ebe hato’o mak hanesan, Sanan, Bikan, Kanuru, Tasu, kadeira no seluk tan.

Mensagen ne’ebe husik hela ba vitima sira, laos atu halo buat hotu, maibe buka hakman deit sofrementu nebe hasoru.

“Hau mai laos lori buat barak, maibe hau mai buka oinsa hakman dadauk buat saida maka imi hasoru dadaun,”hato’o Xanana ho sentimentu tomak. (Ant)