António Armindo Rekoñese Ro’o UPM Mesak Tuan

Smnewstl.com 25-10-2021 (Dili) – Vise-Ministru Interiór, António Armindo rekoñese, ró patrullamentu sira-ne’ebé Unidade Polísia Marítima (UPM) uza mesak tuan nune’e difikulta servisu kontrolu iha tasi.

Executivo aprezenta kestaun ne’e, relasiona ho preukupasaun husi Komandante UPM, Superintendente Basílio de Jesus.

Ba solusaun problema ne’e, Antonio Armindo dehan, Komandu Jerál Polísia Nasionál Timor-Leste (PNTL) loke ona terderizasaun, no iha ona kompañia balun maka selesionadu hodi halo manutensaun.

“Ró sira-ne’e tuan hotu, maibé foin dadauk, Polísia halo ona tenderizasaun bá iha manutensaun no agora iha kompañia ida maka manán ha’u seidauk hatene,” dehan Vise-Ministru Interiór, António Armindo, iha salaun Novu Turízmu, Dili, Segunda ne’e.

Nia hatutan, António Armindo kompañia vensedór ne’ebé atu halo manutensaun bá ró sira-ne’e, prosesa ona sasán spare parts husi li’ur mai Timor-Leste atu bele hadi’a ró sira-ne’e.

“Ha’u hatene kompañia sira-ne’ebé mak manán parese hameno ona sasán spare part sira-ne’ebé mak lori mai par atu bele hadi’a ró sira-ne’e. Ha’u hanoin tenki hadi’a sira-nia ró ne’e, tanba sira-nia servisu iha tasi ne’e importante loos,” afirma nia.

Maski nune’e Governante ne’e relata, daduak ne’e, ró Lusitânia ho ró MB ki’ik de’it mak kondisaun di’ak hodi halo operasaun iha tasi.

Enkuantu, ró NRL Kay Rala ho ró sira seluk avaria hela, no seidauk halo manutensaun.

Antes ne’e, Komandante UPM, Superintendente Basilio de Jesus aprezenta katak, kondisaun ró ne’ebe at prezudika tebes servisu UPM nune’e deside apoio dadauk servisu iha rai maran deit.(ant)