ANATL ‘Koko’ Recurso Salva Ema Husi Dezastre Ahi Han Aviaun

Smnewstl.com 19-11-2021 (Dili) – Autoridade Navegasaun Aeroportu Timor-Leste (ANATL) hamutuk ho entidade ne’ebé toma konta servisu iha Aeroportu Comoro, realiza simulasaun kona-ba ezersísiu emerjénsia ahi han aviaun atu responde bá kritéria ne’ebé Organizasaun Internasionál Aviasaun Sivíl (ICAO-sígla inglés) nian.

Partisipa iha atividade simulasaun ne’e kompostu husi ekipa saúde, Bombeirus, operadór airline, servisu migrasaun, Cruz Vermella Timor-Leste (CVTL), Polísa Nasionál Timor-Leste (PNTL) inklui traballadór sira husi Pax cleaner ne’ebé sai hanesan pasajeirus, no entidade seluk tan.

Objetivu prinsipál husi simulasaun ne’e mak atu prepara rekursu umanus no rekursu tékniku husi entidade hotu nian, nune’e bainhira mosu asidente ahi han aviaun, ekipa bele responde lalais, nune’e bele salva ema-nia vida.

Prezidente Konsellu Administrasaun ANATL Empreza Públika, José Trindade da Cruz Pinto hateten, atividade simulasaun no ezersísiu emerjénsia ahi han aviaun ne’e halo, atu kompleta tan rekizitus internasionál husi ICAO nian.

“Ezersísiu planu emerjénsia ida-ne’e iha tenki halo beibeik, hodi nune’e bele prienxe rekerimentu husi ICAO ho AACTL nian, halo hodi koko oinsá ANATL hamutuk ho entidade relevante, bele halo koordenasaun uza rekursu hotu-hotu ne’ebé mak iha, hodi nune’e bele atende kuandu situasaun emerjénsia mosu mai,” dehan Prezidente ANATL, José Trindade, iha diskursu hafoin halo simulasaun, sesta ne’e iha Aeroportu Comoro, Dili.

José Trindade hatutan, atividade simulasaun hanesan ANATL halo beibeik ona iha tinan sira liu bá iha Aeroportu Comoro no mós Aeroportu Baucau, maibé atividade ne’e halo ho eskala ki’ik.

“Ezersísiu ida-ne’e ANATL halo beibeik, maibé, durante tinan barak nia laran, nunka halo ho Full Scala, halo ho eskala ki’ik-oan katak, entidade sira iha Aeroportu de’it mak halo,” dehan nia.

Sorin seluk, Ministru Transporte Komunikasaun (MTK), José Agostinho da Silva konsidera, atividade simulasaun ne’e importante tebes iha servisu aereo nian, nu’udar rekizitu ida atu bele sertifika Aeroportu tuir padraun Internasionál ICAO nian.

“Aeroportu sei sertifika tanba ne’e presiza preparativu liga ho rekezitu sira ne’ebé maka organizasaun sivil mundiál hatúr, eventu ida ne’e nu’udar parte ida hosi rekejitu sira ne’ebé maka iha, entaun planu emerjénsia sira ne’e hahú hosi local standby, full emergency no emergency close, ne’e informasaun loos ba ita hotu liu-liu bá sira ne’ebé maka halo movimentu uza meiu transporte aereo,” afirma José Agostinho.

Governante ne’e hatutan, safety and security ne’e importante teb-tebes iha setór aviasaun sivíl Timor-Leste nian, tanba tenki asegura bainhira mosu asidente aviaun monu ruma, bele responde emerjénsia.

Alem de ne’e, José Agostinho mós rekuiñse, iha rísku ne’ebé boot tebes, maski setór ne’e mós importante iha nasaun.

Entretantu, serimónia simulasaun no ezersísiu emerjénsia ne’ebé hala’o iha kampu Aviasaun Aeroportu Internasionál prezidente Nicolau Lobato ne’e, hetan partisipasaun husi Ministru MTK, José Agostinho da Silva, kórpu diplomátiku, autoridade sivil no militár, no funsionáriu sira ANATL, AACTL no seluk tan.(ant)