Amerika Komitmentu Rehabilita Aeroportu Baucau

Smnewstl.com 11-11-2021 (Dili) – Estadus Unidus Amérika (EUA) manifesta prontidaun nafatin fó apoiu bá estadu Timor-Leste hodi halo reabilitasaun bá Aeroportu Baucau.

Komitmentu ne’e reafirma husi Asistente Adjunta Ministru Defeza EUA bá Ázia Súl no Sudeste Aziátiku, Lindsey W.Ford, bainhira hala’o enkontru ho Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Lere Anan Timur, no mós Maijór Jenerál Falur Rate Laek, iha kuartel jenerál F-FDTL Fatuhada Dili, Kinta ne’e.

Lindsey W.Ford sublinha, EUA kontinua fornese apoiu bá Timor-Leste atu hadi’a aeroportu Baucau tanba kobsiderado bá futuru la’ós uza de’it bá militár, maibé mos bá atividade negósiu no komersiál nian.

“Ami mos ko’alia kona-ba aeroportu Baucau ne’ebé orsida ha’u sei bá vizita, husi ha’u-nia vizita bá aeroportu sei haree oinsá ami bele fornese apoiu hodi reabilita ne’ebe la’ós uza de’it bá iha parte militár nian, maibé iha domíniu sivíl nian iha futuru mós,” dehan Lindsey W.Ford.

Reprezente governo Amerika ne’e fubdamenta, dadauk ne’e, tekniku sira komesa ona hamoos pista aeroportu nian, no sei konstrui mós lutu perímetru, nune’e bá futuru bele responde bá dezastre naturál no apoiu umanitáriu sira seluk.

Nune’e mós, ho reabilitasaun aeroportu Baucau ne’e, sei bele fó vantajen ekonómiku bá Timor-Leste, liu husi turízmu no seluk tan.

Xefe Estadu Maiór Jenerál F-FDTL, Tenente Jenerál Lere Anan Timur haktuir, projetu reabilitasaun Aeroportu Baucau ne’e realiza bainhira hala’o hasoru malu ho Xefe Estadu Maiór Jenerál Amerikanu, mak husu apoiu atu reabilita Aeroportu Baucau ne’e.

“Ami na’in-rua Xefe Estadu Maiór Jenerál Amerikanu, ami-nia konversa, ami ko’alia sé bele ajuda ami reabilita ami-nia aeroportu, no hato’o bá nia governu, governu simu, entaun ha’u mós mai hato’o bá ita-nia governu, ita-nia governu simu, ne’e mak sira prontu atu reabilita ita-nia aeroportu Baucau,” dehan Lere.

Bainhira obra ne’e atu hahú, mosu pro no kontra iha públiku, tanba diskonfia EUA sei estabelese sira-nia baze militár iha Baucau.

Tan ne’e Lere dehan, projetu reabilitasaun Aeroportu Baucau ne’e halo tuir de’it akórdu téknika militár ne’ebé EUA ho Timor-Leste establese ona.

“Ohin ha’u ko’alia bá nia, aeroportu ne’e, bazeia bá ita-nia kooperasaun tékniku militár, ita-boot mai ajuda la’ós mai sai na’in bá Aeroportu, na’in ne’e ami Timor. Ohin nia dehan, ami apoiu saida mak imi presiza, mais ida mak ne’e, presiza apoiu ho fuan ho laran, labele apoiu ho interese,” afirma nia.

Tenente Jenerál Lere subliña, bainhira projetu reabilitasaun Aeroportu Baucau remata, maka governu Timor-Leste sei deside futuru utilizasaun Aeroportu refere nian atu uza bá komponente aero ka Aeroportu ekonómiku no komersiál.

Entretantu, iha vizita Asistente Adjunta Ministru Defeza EUA ba Ázia Súl no Sudeste Aziátiku, Lindsey W. Ford nian bazeia ba parseria seguransa ne’ebé aumenta ba beibeik entre EUA no Timor-Leste, liu-liu komitmentu EUA nian ho millaun $10 atu rehabilita hamutuk ho Governu Timor-Leste nia aeroportu Baucau, ne’ebé nia vizita iha loron 11 fulan Novembru.

Reabilitasaun ne’e sei fó asisténsia ba F-FDTL liuhusi kriasaun komponente Aéreu ida ne’ebé sei ajuda Governu Timor-Leste hodi monitoriza di’ak liután nia territóriu, hodi hatán ba dezastre naturál sira no promove dezenvolvimentu ekonómiku.(ant)