Aman ba Polisia Militar, Abel Niki Triste Lere Fila ba Vida Sivil

Smnewstl.com 17-01-2022 (Dili) — Komandante Unidade Polísia Militár (PM), Major Abel da Costa Xavier ‘Niki’ sente triste, tanba Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur nu’udar aman bá instituisaun no PM atu husik hela ona sira hodi fila bá vida sivíl.

“Ikus liu, hato’o ami-nia liafuan triste no liafuan kontente, tanba ami rona katak, Suaexelénsia (Tenente Jenerál Lere) atu bá vida sivíl hakotu ona missaun iha fulan ida rua tan,” dehan Major Abel da Costa ‘Niki’, iha diskursu serimónia aniversáriu Unidade Polísia Militár bá dala 17, iha Quintal Boot, Dili, Segunda-feirane’e.

Abel Niki haktuir, nu’udar oan iha sentimentu triste no kontente hotu, bainhira aman Tenente Jenerál Lere Anan Timur husik ona instituisaun F-FDTL hodi fila bá vida sivíl hetan fali fatin ne’ebé dignu.

“Ami hanesan oan, ami-nia aman kuandu ses husi oan sira-nia le’et oan sira sempre triste no kontente sé karik aman bá hetan fali fatin ida-ne’ebé mak dignu, fatin ne’ebé boot, oan sira sente orgullu kontente,” tenik nia.

Fatin hanesan, Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur hateten, bainhira nia sai husi instituisaun F-FDTL, Major Jenerál Falur Rate Laek mak sei troka fali nia fatin hodi lidera instituisaun ne’e hamutuk ho Brigadeiru Jenerál sira seluk.

“Imi hatene sé ha’u sai sé mak bá ha’u-nia fatin ne’e la’ós forsa ne’ebé boot teb-tebes, imi iha imi-nia aman, imi-nia Pai Major Jenerál Falur Rate Laek, imi-nia aman imi-nia Pai Aluk, Sabika, Maunana, ema seluk laiha atu mai troka ha’u, só sira-ne’e mak hakarak lakoi tenki mai hamrik iha ha’u-nia fatin,” dehan Tenente Jenerál Lere Anan Timur.

Lere afirma, maske fila ona bá vida sivíl, maibé sei hanoin nafatin instituisaun F-FDTL iha nia memoria. “Hanoin katak, ha’u sei bá fatin seluk mós ha’u sei hanoin imi, ha’u mós ne’e últimu momentu ne’ebé ha’u hamrik iha imi-nia oin, atu reforma ou rejigna ne’e ha’u-nia direitu ida, hanesan mós imi-nia direitu,” subliña nia.

Lere rekuiñese, durante nia mandatu lidera F-FDTL, Unidade Polísia Militár moris halo tinan 17 ona, maibé kontinua hasoru difikuldade oi-oin, maski halo esforsu hotu atu hadi’a instituisaun no unidade ne’e.

“Iha tinan 17 nia laran, ha’u nu’udar imi-nia komandante ha’u moris imi-nia problema, ha’u preukuka imi-nia problema, maibé ha’u labele halo buat ida, ita husu ema lakoi fó ou ema la fó, ita hein, to’o loron seluk sei fó,” nia dehan tan.

Entretantu, Lere Anan Timur hatama ona karta reforma bá Ministru Defeza, Filomeno Paixão de Jesus hodi husu reforma, no atu kandidatu bá Prezidente Repúblika nu’udar karreira ikus serví povu no nasaun.(ant)