Aban Anunsia Rezultadu Izame Nasionál, PNTL Sei La ‘Tolera’ Estudante Halo Barullu

Smnewstl.com 17-01-2022 (Dili) — Komandu Polísia Naisonál Timor-Leste (PNTL) Munisípiu Dili sei koloka membru bá iha eskola Sekundáriu sira iha Kapital Dili hodi asegura seguransa ligado ho rezultado izame nacional ne’ebe sei anunsia husi Ministériu Edukasaun iha loron, 18 Janeiru 2022.

Segunda-feira ne’e, hafoin enkontru ho Komandante Eskuádra Postu Administrativu sira, inklui Xefe Seksaun sira, Komandante PNTL Munisípiu Dili, Superintendente Xefe Henrique da Costa afirma, sei koloka membru Ofisiál Polísia Eskola (OPE) atu fó seguransa másimunune’e evita konflitu entre estudante sira, no mós asidente ne’ebe kontribui ba halakon vida.

Henrique informa, sei involve mós Unidade Espesiál Polísia (UEP), Tránzitu Nasionál, Servisu Informasaun Polísia (SIP), Unidade Polísia Marítima (UPM) no Unidade Patrullamentu Fronteira (UPF) hodi asegura situasaun wainhira nesesariu.

“Primeiru ita hatene loron iha dia 18 ne’e sei fahe kaderneta bá estudante sira-ne’ebé mak remata sira-nia eskola, entaun ita ko’alia hamutuk ho Komandante sira para asegura di’ak liután bá iha loron aban ninian. Ita sei koloka OPE sira, ita sei koloka patrulla sira bá eskola liu-liu bá fatin sira mak ita identifika hanesan rísku ameasa ne’e, ita sei koloka ita-nia ekipa bá iha ne’ebá, atu nune’e sira bele responde kedas iha ne’ebá,” informa Superintendente Xefe Henrique da Costa iha knár fatin Komandu Polísia Munisípiu Dili, segunda ne’e.

PNTL mós identifika ona eskola ne’ebé rísku bá konflitu iha área hanesan, Postu Administrativu sira, nune’e bainhira mosu problema ruma, Polísia bele atua lalais.

“Kada postu administrativu keta-ketak, hanesan iha Dom Aleixo nian iha eskola tolu iha ne’ebá, depois iha Cristo Rei ninian mós iha eskola rua iha ne’ebá, iha Na’in Feto ninian iha eskola ida, iha Vera Kruz iha eskola rua mak identifika ona, sira-ne’e ita sei koloka ita-nia ema, atu nune’e asegura,” tenik nia.

Tanba ne’e, Henrique da Costa apela bá estudante finalista sira, bainhira uza transporte kareta no motor, tenki kontrola asesores no dokumentu sira, no mós tenki uza kapasete, maibé labele uza kanu resin, tanba Polísia sei halo pasarevista.

“Kuandu aban uza transporte mós nafatin atensaun bá asesores, atensaun bá dokumentu sira, tanba ita-nia operasaun sei nafatin la’o hanesan baibain, ne’ebé husu atu nune’e kuandu halo movimentu ruma karik, labele haluha dokumentu sira-ne’e,” apela nia.

Alem de ne’e, Komandu PNTL mós sei koloka membru sira hamrik tuir iha dalan ninia, atu kontrola motorizada sira-ne’ebé la uza kanu resin no mós kontrola, bainhira konflitu akontese, Polísia bele responde kedas.(ant)