Smnewstl.com (Luanda) – Prezidente Republika, José Ramos-Horta nia vizita foin lalais ba Luanda rezulta iha avansa diplomátiku ne’ebé signifikativu entre Timor-Leste no Angola. Durante sorumutuk hirak ne’e, Prezidente Ramos-Horta sai sasin ba asinatura instrumentu legál importante tolu ne’ebé ho objetivu atu hasa’e kooperasaun entre nasaun rua ne’e.
Akordu sira, ne’ebé asina iha prezensa husi Prezidente Ramos-Horta ho nia omólogu angolanu João Lourenço, inklui Nota Entendimentu ida kona-ba konsulta polítika bilaterál sira, akordu ida entre akademia diplomátiku sira, no akordu esepsaun vistu nian ba pasaporte diplomátiku no servisu nian.
Ajenda Prezidente Ramos-Horta nian iha mós diskusaun sira ho Prezidente Lourenço no vizita ida ba Memoriál António Agostinho Neto, iha ne’ebé nia fó omenajen ba Prezidente dahuluk no eroi nasionál Angola nian. Destaka importánsia husi legadu Neto nian, Ramos-Horta subliña nesesidade atu estuda no prezerva ninia ideia sira ba jerasaun sira tuirmai.
Líder timoroan ne’e mós tuir planu sei ko’alia iha Asembleia Nasionál Angolanu iha sesaun espesiál ida, hodi hametin liután lasu diplomátiku sira entre nasaun luzófonu rua ne’e.
Vizita ida-ne’e marka pasu signifikativu ida hodi hametin relasaun entre Timor-Leste ho Angola, membru rua hosi Comunidade dos Países de Língua Portuguesa (CPLP-sigla portugés), desde estabelese relasaun diplomátiku sira iha tinan 2002. (*/Smnews)
Komentariu