Smnewstl.com | Dili, 19 Outubru 2026 – Timor-Leste prepara an atu sai uma-na’in ba Konferénsia Ministru Justisa da Komunidade Países de Língua Portuguesa (CPLP) ba dala-19, ne’ebé sei realiza iha Dili, iha loron 26 no 27 Outubru 2026. Krime organizadu, inklui jogu ilísitu, sei sai entre asuntu prinsipál ne’ebé Estadu-membru sira sei diskute iha enkontru ne’e.
Ministru Justisa, Sérgio de Jesus Fernandes da Costa Hornai, hato’o progresu preparasaun no prontidaun Timor-Leste ba Primeiru-Ministru, Kay Rala Xanana Gusmão, durante enkontru ne’ebé hala’o iha Palásiu Governu, Dili, Segunda-feira (19/10).
Enkontru ne’e fó oportunidade ba Ministru Justisa atu informa kona-ba servisu preparatóriu ne’ebé Ministériu Justisa, hamutuk ho ekipa servisu no entidade ministeriál relevante sira, hala’o ona atu asegura konferénsia ne’e bele la’o tuir planu.
“Ha’u iha oportunidade atu hasoru malu ho Primeiru-Ministru, Xanana Gusmão, hodi informa no relata progresu servisu balun ne’ebé Timor-Leste, liuliu IX Governu, halo iha setór justisa, relasiona ho Konferénsia Ministru Justisa da-19 entre Estadu-membru CPLP, iha loron 26 no 27 Outubru,” Ministru Justisa hateten.
Preparasaun ne’e la’ós de’it atu organiza enkontru diplomátiku, maibé mós atu asegura Timor-Leste kumpre responsabilidade nu’udar nasaun ne’ebé kaer prezidénsia rotativa CPLP nian.
Tanba ne’e, Ministériu Justisa kontinua halo koordenasaun ho instituisaun relevante sira atu prepara aspetu tékniku, organizasionál no substansiál ba konferénsia.
Daudaun ami halo hela ezersísiu preparasaun no mai relata ba Primeiru-Ministru kona-ba prontidaun, relatóriu no progresu servisu sira ne’ebé Ministériu Justisa, hamutuk ho ekipa, halo iha koordenasaun ho entidade ministeriál sira ba realizasaun konferénsia ne’e,” nia hatutan.
KRIME ORGANIZADU NO JOGU ILÍSITU SAI FOCO DISKUSAUN
Konferénsia Ministru Justisa CPLP ba dala-19 sei fó atensaun ba krime organizadu, inklui jogu ilísitu, ne’ebé sai dezafiu ba seguransa, estabilidade no sistema justisa iha nasaun sira.
Krime transnasionál la’ós problema ne’ebé limita de’it ba nasaun ida, tanba atividade kriminál sira bele ultrapasa fronteira no envolve rede kriminál ne’ebé opera iha jurisdisaun oioin.
Situasaun ne’e presiza kooperasaun entre Estadu-membru sira, inklui partilla informasaun, hametin mekanizmu jurídiku no promove asaun koordenada atu prevene no kombate krime.
Liuhosi konferénsia ne’e, Estadu-membru CPLP sira sei iha oportunidade atu troka esperiénsia, diskute dezafiu komún no buka dalan atu hametin kooperasaun iha setór justisa, liuliu iha prevensaun no kombate krime organizadu transnasionál.
PM XANANA ORIENTA HAMETIN PREPARASAUN
Iha enkontru ne’e, Primeiru-Ministru Kay Rala Xanana Gusmão orienta Ministériu Justisa no entidade relevante sira atu kontinua hametin preparasaun no koordenasaun, atu konferénsia ne’e bele hala’o ho susesu.
Orientasaun ne’e reflete importánsia koordenasaun entre instituisaun sira atu asegura Timor-Leste bele hala’o knaar nu’udar uma-na’in no fasilitadór ba diálogu entre Estadu-membru CPLP sira.
Konferénsia ne’e espera atu prodús “Deklarasaun Dili”, nu’udar dokumentu konjuntu ne’ebé sei reflete kompromisu no orientasaun Estadu-membru sira kona-ba asuntu justisa no kombate krime transnasionál, tuir kontéudu ne’ebé parte sira konkorda durante konferénsia.
Deklarasaun ne’e bele sai referénsia importante ba esforsu kooperasaun entre nasaun sira, hodi hametin sistema justisa no promove resposta koordenada ba dezafiu krime organizadu ne’ebé afeta sosiedade iha rejiaun no mundu.
Ho preparasaun ne’ebé kontinua hala’o, Timor-Leste sei simu delegasaun husi Estadu-membru CPLP sira iha Dili, atu hametin relasaun kooperasaun no promove kompromisu hamutuk iha setór justisa.(Smnews/)
Komentariu