Smnewstl.com| Dili, 4 Juñu 2026 Diresaun Servisu Investigasaun Kriminal (DSIK) detén suspeitu mane ida ho inisial J.S., ne’ebé alegadamente envolve iha kazu violasaun seksuál hasoru menoridade iha Munisípiu Manatuto.
Tuir informasaun ne’ebé SMNEWSTL hetan, operasaun detensaun realiza iha área Kolmera, Dili, iha oras tuku 19:00, bainhira kondenadu hala’o hela atividade desportiva iha gym ida.
Tribunal Judisiál Primeira Instánsia Baucau hasai mandadu detensaun ho NUC 0152/18.PNSIC hodi kaer no lori kondenadu JS ba Estabelesimentu Prizionál atu kumpre pena prizaun.
Tuir dokumentu oficial ne’ebé SMNEWSTL asesu, individu refere hetan kondenasaun tinan 10 iha prizaun tanba konsidera sala iha krime Abuzu Seksuál hasoru Menoridade, tuir Artigu 177 husi Kódigu Penál.
Mandadu ne’e ordena autoridade sira atu halo detensaun, entrega orijinál mandadu ba kondenadu, regista oras no loron detensaun, no komunika kedas ba Juiz kompetente bainhira operasaun remata.
Informasaun ne’ebé hetan hatudu katak autoridade sira konsege lokaliza no detein kondenadu iha área Kolmera, Dili, bainhira nia hala’o atividade iha gym ida.
Kazu ida-ne’e demonstra kompromisu autoridade judisiál no órgaun seguransa sira atu asegura katak sentensa tribunal sira bele implementa ho rigor, hodi proteje vítima sira no komunidade.
SMNEWSTL sei kontinua akompaña dezenvolvimentu kazu ida-ne’e no fó atualizasaun tuir informasaun ofisiál sira.(/SMnews)
Lee nain: 4
Lee Mós:
IOM Falisita Ekipamentu Verifikasaun Dokumentu Falsu Tolu Bá Governo