Smnewstl.com 26-09-2024 ( ) – Ministru Negósius Estranjeirus no Kooperasaun, foin lalais ne’e, simu audiénsia ida hosi nia omólogu Ministru Poder Populár ba Negósius Estranjeirus Venezuela nian, ́ ho delegasaun, hodi diskute diskute kooperasaun bilateral no interese nasaun rua nian.
Enkontru ne’ebé hala’o iha okazisaun Assembleia Jerál ONU ba dala-79 iha Nova Iorke ne’e, Ministru Poder Populár ba Negósius Estranjeirus Venezuela nian, Yván Gil Pinto reafirma, Repúblika Bolivariana Venezuela fó apoiu totalmente ba Timor-Leste atu sai hanesan uma-na’in ba realizasaun semináriu C-24 (Komité Espesiál ba Deskolonizasaun) ne’ebé tuir planu sei hala’o iha fulan-Maiu tinan 2025 iha Dili.
Governante Venezuela ne’e mós, saúda Timor-Leste ho Venezuela ne’ebé fahe prínsipiu hanesan hodi respeita ba karta Nasoins Unida nian, no mós informa kona-ba situasaun polítika no ekonómika ne’ebé Venezuela hasoru liu-liu embargo ekonómika ne’ebé Estadus Unidas Amérika aplika ba sira. Venezuela nia odamatan nakloke ba diálogu ho Estadus Unidus Amérika atu bele normaliza fila-fali situasaun entre nasaun rua nian.
Iha fatin hanesan, Ministru Negósius Estranjeirus no Kooperasaun, Bendito Freitas apresia ba apoiu ne’ebé Venezuela fó ba kauza Timor-Leste nian to’o hetan independénsia, no mós suporta ba realizasaun semináriu C-24 ne’e rasik.
Ministru Bendito afirma, Timor-Leste ho Venezuela kontinua servisu hamutuk iha área kooperasaun multilateral, tanba maski nasaun rua ne’e ki’ik, maibé, iha mós lian hanesan ho rai sira seluk perante Nasoins Unidas.
Ne’eduni, Timor-Leste konkorda atu elabora área kooperasaun sira ho Venezuela liu-liu hanesan kapasitasaun rekursu umanu, edukasaun, konsolidasaun instituisaun demokrátiku no mós oferese bolsu estudu ba Timoroan sira iha área medisina. (*/Smnews)
Komentariu