Timor -Leste -Malazia Formaliza Ona Akordu Servico Aero

Smnewstl.com Ministru Negósius Estranjeirus no Kooperasaun (MNEK) Timor-Leste, Bendito dos Santos Freitas, reprezenta Ministru Transporte Komunikasaun, Miguel Manetelo, ofisialmente formaliza ona Akordu Servisu Aero ho Governu Malázia kona-ba konektividade transporte aero entre rai-rua.

Akordu refere asina husi Ministru Negósius Estranjeirus no Kooperasaun, Bendito Freitas ho Ministru Transporte Malázia, YB Loke Siew Fook, iha okaziaun vizita ofisiál Ministru Bendito Freitas nian ba nasaun refere.

Ministru Bendito hateten, Air Service Agreement ne’e ofisialmente asina ona, tanba ne’e, ba oin tékniku husi Timor-Leste ho Malázia bele prepara di’ak liután hodi bele loke dalan ona ba operasaun aviaun husi Dili ba Kuala Lumpur no vise-versa.

Akordu ASA ne’e importante tebes, tanba bele tulun ona Timor-Leste nia dezenvolvimentu iha setór konektividade aero nian, no mós sira bele fahe ona esperiénsia téknika ba tékniku sira-ne’ebé mak servisu iha aviasaun sivil.

Partisipa iha serimónia asinatura akordu ASA ne’e, Enkarreada Negósiu Embaixada Timor-Leste ba Malázia, Adelina Martins, Prezidente Autoridade Aviasaun Sivil Timor-Leste no seluk tan. (*/Smnews)