AMI RUA NE’E KONTA MATE TIA ONA

Ami Rua Ne’e Konta Mate Tia Ona

=======================================

ISTORIA HUSI ANTONIA DIAS HO NIA ALIN CARLOS DIAS

====================================
‘Loron Rua, Kalan Ida Iha Deit Tasi laran’
====================================
Ami rua sai husi uma tuku sia ho balu dadersan. To’o iha tasi klaran depois dada tia redi kuaze iha tuku ida resin ona, hau komesa bo’ok Beró nia motor atu hamoris nune’e ami bele fila, maibe situasaun ne’ebe la imagina derepenti akontese.

Beró ne’ebe ho kondisaun diak hela, hau baku ba la moris. Hare fila fali, nia gir mak doll tia ona, entaun hau komesa sente tauk hodi dehan ba alin, ai…Beró baku la moris.

Hateke ba mai, sor-sorin mamuk hotu, hateke ba alin nia oin, hau hakoak nia tanis hodi bolu ‘Ai..ina ouuuu…ajuda ami ba.

Husi lokraik to’o fali kalan, be’e hemu hotu, alin forsa laiha tia ona tamba la auguenta hamrok no hamlaha.

Hau mos sente hanesan saida mak alin sente, maibe hateke ba nia ne’ebe toba deit ona, hau laiha liafuan atu koalia.

Hau kontinua ho forsa oituan ne’ebe iha haka’as a’an dayung nafatin Ró tuir arus tasi nian husi kalan to’o fali loron.

Sente labele ona ho rai nia manas, entaun hau ba hakoak nia, hodi ami rua tama ba toba tia iha konzelador ikan nian.

Wainhira lakon ona esperansa to’o fali lokraik tuku lima, derepenti hakfodak mai hau hateke hetan rai henek mutin. Entaun hau fanun alin hodi dehan, o ajuda hau hodi itrua dayung likus Ró ne’e ba neba.

To’o tia tasi ninin, hau haruka nia atu habokon tia isin ho tasi be’en hafoin foti matan hateke hetan fali uma oan ida.

Ami rua hakbesik a’an ba uma ne’e hetan mak alin feto kikoan ida. Hau dehan ba nia, ajuda fo be’e ami rua hemu lai.

Fo tia be’e mai ami, hau buka tuir fali alin ne’e halai la hetan ona. Nia halai husik hela ami rua. Asu ho manu iha uma ne’e iha, tamba durante kalan ida loron rua iha deit tasi laran, entaun ami rua laiha forsa ona

Hare fali Nú laloir ida tula hela iha hadak leten, entaun hau dehan ba alin hodi foti ba fera nune’e han netik isin no hemu be’en hodi aguenta to’o tuku hitu kalan mak tia ida ho tiu ne’ebe fo aihan mai ami ne’e mai hodi lori ami rua ba sira nia uma.

To’o iha ne’eba maka foin kontaktu fali ba familia sira dehan, ami rua diak hela, maibe terdampar iha Alor.

Atu dehan karik, ami rua mate tia ona. Sorti ba maromak ne’e bo’ot duni nune’e ohin maun sira ho ita nia polisia bele mai foti ami.

Maun imagina to’ok, kalan ida, loron rua iha deit tasi laran, la han no hemu, oinsa mak ita la lakon esperansa.

Hau hakoak alin hodi dehan, alin o aguenta ba, tasi fo han ita, tasi mos han ita, maibe hau dehan ba nia, laos agora. Nai ajuda ami rua ba, la imagina hakfodak, hau hateke hetan rai maran, hau fanu nia hodi dehan, hader ajuda hau, ita nain rua dayung Beró nee ba tasi ninin.

Atu dehan saida husi istoria ida ne’e, fiar, esperansa, reza sei lori ita sai husi situasaun ida ne’ebe defisil maske ita rasik hatene katak, mate ne’e mai tia ona iha ita nia oin.

Pasu pozitivu seluk husi istoria moruk ne’e mak dala ruma, relasaun maun ho alin ida iha uma laran sente hanesan bai-bain hela. Maibe kuando monu ona ba situasaun defisil, maun mak ema ida ne’ebe hamrik firme hodi fo esperansa ba nia alin hanesan saida mak sira nain rua infrenta.

Hakoak malu tanis iha situasaun defisil, hakoak malu mos tanis wainhira sai fali husi mate hateke ba familia sira mak hamrik hein hela sira nia prezensa hanesan ne’ebe ita akompanha iha sira nain rua nia jornada durante kalan ida, loron rua iha tasi laran. (Jornalista/Mariano da Costa)