Vizita Escola ESTV Sao Joao Maria Vianney, Lemos Promete Rezolve Problema Ne’ebe Escola Infrenta

Smnewstl. com – Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Domingos Lopes Lemos akompaña husi Diretór Nasionál Ensinu Sekundáriu Tékniku Vokasionál, Diretór Nasionál Ensinu Sekundariu Jéral, vizita ba eskola Sekundária Tékniku Vokasionál (ESTV), Joâo Maria Vianney, Same.

Iha visita ne’e Sekretáriu Estadu ESGETV Domingos Lopes Lemos husu ba profesores atu nafatin servisu hamutuk, koordenasaun di’ak, hatudu ambiente armoniozu no iha sentidu pertense no responsabilidade hodi haree ba objetivu ida de’it, hadia kualidade edukasaun iha Timor Leste espesialmente Munisipiu Manufahi.

“Kona-ba materiál prátika menus. Iha IX governu Konstitusional liu husi programa Ministeriu Edukasaun iha komitmentu bo’ot hakarak solusiona difikuldade no preokupasoens hirak ne’ebé mak eskola sira infrenta hanesan menus material pratika ba alunu”, dehan governante ne’e.

Agora dadaun Ministeriu Edukasaun hahu halo ona levantamentu hodi identifika materiais, ekipamentus no kondisoens edifisius husi kada eskola sira. Husi levantamentu no informasaun kredivel hirak ne’e, mak sai hanesan referensia importante ida, hodi ajuda halo ajustamentu ba iha Planu Assaun Annual 2024, hodi nune’e, fazeadamente bele resolve ona situasaun hirak ne’ebé eskola hasoru, liu hosi Orsamentu Jerál Estadu.

Governante ne’e mós esplika ba professóres katak professor sira ne’ebé assina ona kontratu termu sertu iha fulan Abríl 2023 ne’e iha tempu badak sei halo pagamentu ba salariu mensal ho nia retroativu.

Ministeriu Edukasaun iha planu ba rekrutamentu professores tuir ida-idak nia area ka espesialidade, liu husi konkursu Meritu.

Iha visita ne’e Sekretáriu Estadu ho ekipa ba vizita Auditóriu no ekipamentu prátika sira ne’ebé mak eskola iha refere.

Eskola Sekundária Téknika Vokasionál São João Maria Vianney estudante hamutuk na’in 71, Professor 18.

Hafoin vizita eskola São João Maria Vianney governante ne’e mós ho ekipa hala’o vizita kedas ba Eskola Tékniku Vokasionál Alas Dotic. Estudante Tékniku Vokasionál Dotic estudante hamutuk na’in 96.(SMNews)