2022, Hahú Projetu Rekonstrusaun Bá Edifísiu Eskuádra Polísia Dom Aleixo

Smnewstl.com 17-12-21 (Dili) — Governu liu husi Ministériu Interiór prevé ona orsamentu kuaze milliaun $ 3 hodi hahú projetu rekonstrusaun bá edifísiu eskuádra Polísia Dom Aleixo Munisípiu Dili iha fulan Fevereiru tinan 2022.

Vise-Ministru Interiór, António Armindo hateten, kondisaun edifísiu Eskuádra Polísia Dom Aleixo kada tinan bainhira udan hahú monu rai, sempre hasoru problema, tanba edifísiu ne’e nakonu ho bee ne’ebé laiha bee dalan atu suli sai.

Tan ne’e nia dehan, ida-ne’e la’ós foin akontese iha governasaun ida-ne’e, maibé akontese beibeik ona bainhira tempu udan.

Nia hatutan, projetu reabilitasaun edifísiu Eskuádra Dom Aleixo ne’e, hetan ona aprovasaun iha Konsellu Administrasaun Fundu Infrastrutura (KAFI), tan ne’e hein de’it atu loke tenderizasaun hodi hahú implementasaun.

“Tinan kotuk bá hahú ko’alia ho komandante sira, depois dezeñu, hanesan ita hatene, foin dadauk ne’e ita fó sai ona katak, ne’e aprova ona iha KAFI, no atu avansa ona bá iha tenderizasaun, ita-nia espetativa ne’e hahú husi Fevereiru tinan oin konstrui ona,” informa Vise-Ministru Interiór, António Armindo, iha Komandu PNTL Munisípiu Dili, sesta ne’e.

Atu implementa projetu ne’e, governu prevé ona orsamentu kuaze milliaun $ 3 hodi reabilita edifísiu ne’e.

“Orsamentu kuaze besik $ 3 milloens, eskolla ne’e Komandu mak sei hatene atu muda bá ne’ebé, ha’u hatene sira iha ona fatin, mais ne’e kompeténsia Komandu Jerál mak hatene, tanba ha’u labele bá muda sira, sira mak buka fatin ne’ebé merese par atu muda membru sira-ne’e temporáriu hodi hein ita-nia konstrusaun,” tenik nia.

Governante ne’e mós orienta ona Komandu Jerál PNTL atu muda eskuádra Polísia Dom Aleixo bá fatin seguru ruma, nune’e hamamuk ona molok projetu ne’e hahú.(ant)