2021: PNTL Dili Rejista Asidente Tráfiku 779, Nain 23 Lakon Vida

Smnewstl.com 04-01-22 (Dili) — Durante tinan 2021 hahú husi fulan Janeiru to’o Dezembru, Komandu Polísia Nasionál Timor-Leste (PNTL) Munisípiu Dili, rejista kazu asidente tráfiku hamutuk 779, iha ne’ebé ema na’in 23 mak lakon vida.

“Hakarak informa bá públiku katak, iha 2021 Komandu Munisípiu Dili, ita rejista asidente tráfiku 779, husi númeru ne’ebé temi, rezulta ema 23 mate,” informa Komandante PNTL Munisípiu Dili, Superintendente Xefe Henrique da Costa, iha knár fatin Komandu Polísia Munisípiu Dili, Tersa-feira ne’e.

Durante tinan 2021 mós, liu husi atividade operasaun ne’ebé komandu Polísia Munisípiu Dili halo, konsege prende transporte hanesan kareta no motor hamutuk 5.434.

No liu husi atividade operasaun ne’e mós, hatama osan bá kofre estadu iha tinan 2021 ne’e hamutuk dólar amerikanu $ $ 249. 359.

“Durante tinan ida operasaun ita hala’o, ita prende transporte tantu kareta ho motor hamutuk 5.434 ne’ebé lori mai iha Komandu Munisípiu Dili hodi lori bá prosesu, no osan multa ne’ebé mak Komandu Munisípiu Dili konsege hatama bá kofre estadu mak hamutuk dólar amerikanu $ 249. 359,” relata Henrique da Costa.

Entretantu, totál infrasaun hamutuk 7.444 ne’ebé infrasaun sira-ne’e, maioria motorista sira la lori dokumentu orijinál, la uza xapa matríkula tantu kareta ho motor ho númeru hamutuk 1.267.

Nune’e mós, sira-ne’ebé mak la uza kapesete hamutuk 771 okupa kuartu lugar no mós ida ikus liu la monta espellu.

Tan ne’e, Komandante Henrique apela bá motorista sira, molok atu halo viajen tantu kareta no motor, tenki kontrola di’ak asesores transporte nian.

“Ita-nia mensajen bá ita-nia komunidade sira, liu-liu bá motorista sira, bainhira atu halo viajen, tenki revista lai kondisaun transporte tantu kareta ho motor, depois iha dalan tenki nafatin respeita bá iha sinais tránzitu ne’ebé iha, no mós respeita ema sira la’o ain, tanba ita-nia asidente tráfiku ne’e barak mós tanba ita soke ema la’o ain iha zebra kross,” apela nia.

Ne’eduni, apela mós bá sidadaun sira katak, iha 2022 ne’e nafatin hotu-hotu koopera ho parte sira liu-liu Komandu Munisípiu Dili, atu nune’e ita hotu-hotu garante Dili sai fatin seguru bá ema hotu, kuandu Dili seguru ema hotu hala’o nia atividade moris nian ho di’ak.(ant)