15 Setembru, Publika Naran Kadetes Foun F-FDTL

Smnewstl.com 06-09-21 (Dili) — Xefe Estadu Maiór Jenerál FALINTIL Forsa Defeza Timor-Leste (F-FDTL), Brigadeiru Jenerál Calisto dos Santos ‘Coliati’ hatete, dia 15 setembru tinan ida-ne’e, sei publika ona naran kadetes foun F-FDTL 600 ne’e.

“Ekimentu husi li’ur prepara ona, maibé tanba pandemia ne’ebé transporte ida atu lori sasán sira mai husi tasi balun ne’e mak sai problema, maibé Setembru nia laran ne’e hahú, data mak ha’u seidauk bele hatete bá ita-boot sira bainhira, maibé ha’u promete katak, dia 15 de Setembru publika naran depois mak sei haree bainhira mak atu lalin sira bá Metinaru,” dehan Brigadeiru Jenerál Coliati, Segunda ohin, iha hafoin partisipa KROP iha Ministériu Finansas.

Brigadeiru Jenerál ne’e dehan, rajaun publikasaun lista naran kadetes foun F-FDTL tarde, tanba prosesu transportasaun ekipamentu bá kadetes foun sira atu utiliza mak iha difikuldades ne’ebé lauza husi pandemia Covid-19.

“Ita presiza númeru ida-ne’ebé boot husu bá iha rai seluk, agora sai seluk mós iha sira-nia regras kona-ba reegras protokolares saúde nian sira tenki kumpre, ne’ebé dalaruma ida-ne’e mak impdete prosesu atu bele prepara ekipamentu militár Timor-Leste husu,” dehan nia.

Nia hatutan, kalendáriu publikasaun lista kadetes foun iha dia 15 setembru ne’e fixu ona, tanba ne’e hein de’it, bainhira mak kadetes foun sira-ne’e atu tama asarama iha Metinaru.(ant)