Smnewstl.com – IX Governu Konstitusional liuhosi Ministériu bá Asuntus Kombatentes no Libertasaun Nasionál nian (MACLN-Sigla Português), Conselho dos Combatentes de Libertação Nacional (CCLN), fiksa ona oráriu iha loron 15 fulan-Janeiru 2025 ne’e, hahú anúnsia ka taka sai lista naran Kombatente sira bá Libertasaun Nasionál nian, ne’ebé molok ne’e rejísta tha ona iha 2009.
Desizaun ida bá publikasaun ida ne’e tamba iha Segunda, 13 Janeiru, horseik MACLN ho CCLN ofisialmente, konklui ona “Assinatura dos EDITAIS Dos Combatentes registados e validados no Segundo Registo de 2009”, iha Salão Três de Março Maubai, edifísiu nasionál MACLN nian iha Comoro-Dili.
Ministru bá Asuntus Kombatentes no Libertasaun Nasionál nian, “-”, informa, hosi totál rejístu 124.782 rejístadus iha segundu rejístu 2009 nian, valida 102.49, pedidus rejístu.
“Hosi 102,49 pedidus rejístu, validadus iha periudu fulan-Outubru 2019, to’o fulan-dezembru 2023, ohin asina no ofisializa hanesan rekoñesimentu Estadu, atu taka iha Sede CCLN Minisipál, Administrasaun Munisípiu no Postu Administrativu sira iha territóriu nasionál hotu, hamutuk 92.591 pedidus rejístu ho ida-idak nia kategória,” Ministru Oan-Soru, mos informa liuhosi Konferénsia Imprénsa, iha Salaun Três de Março Maubai, MACLN, Comoro-Dili,
Baze bá dadus 92.591 ne’e, ho nia karegória sira mak hanesan; (a) Ema ne’ebé halo parte Eskalaun 1, ka Grau 20/24 anus hamutuk ema na’in-14 iha territóriu tomak, (b) Kombatente sira ne’ebé ho Grau 15/19 hamutuk 186, (c) Grau 8/14 hamutuk ema rihun 9.375, (d) Pensaun bá sira ne’ebé Defisiente ka Inkapasidade de traballu, hamutuk 359, (e) Pensaun Sobrevivénsia ema hamutuk 22.252, (f) Prestasaun Pekuniária Únika (PPU) hamutuk ema rihun 23.560, (g) Sira ne’ebé menus hosi tinan-tolu (três anos) 35.271, (h) Sira ne’ebé Naun-Kombatente hamutuk 1.574. Totál mak 92.591.
Tuir estatutu Kombatente Libertasaun Nasionál, Lei Númeru 3/2006, loron 16 Abríl, ne’ebé altera dala-rua, no lei Númeru 9/2009, loron 29 Jullu, no Lei Númeru 3/2024, loron 12 Juñu, lista sira ne’ebé taka sai bá públiku iha loron 15 fulan-janeiru tinan ida ne’e, no lista sei taka iha territóriu tomak iha sede CCLM Munisipiu nian, sede autoridade munisipál, no postu administrativu sira hotu.
Ministru Oan-Soru husu bá Interessadu sira atu bele hakat bá munisipiu no postu administrativu hosi ida-idak nia moris fatin, atu bele haree lista naran sira ne’e, tanba nasionál sei la prega lísta, iha ministériu no CCLN, Comoro.
Bá Kombatente sira ne’ebé atu konsulta lista tomak hosi editál no ho bele vizita portal, konsulta Veteranus nian liuhosi pájina internet MACLN.NET, hodi bele asesu dadus balu ho formatu eletrónika nian.
Governante ne’e mós husu bá Kombatente Libertasaun Nasionál hotu-hotu katak, tuir lei, sei iha loron 60 atu aprezenta reklamasaun kona-bá sira-nian dadus, ka kontestasaun hasoru Kombatente ruma nia dadus, nune’e bele hadi’a.
“Mais, la mai koalia buat seluk, tanba verifikasaun ne’ebé halo, iha munisípiu hotu-hotu, ita-boot sira imajina, hahú hosi 2019, mai termina iha 2023 dezembru, maibé, nia prosesu implementasaun tuir regra, foin mak agora dadauk ita hasai, tanba ita-boot sira hatene, iha orsamentu 2025 mak ita foin prevee orsamentu bazeia bá dadus ne’ebé mak hasai,” Ministru, “Oan-Soru” esplika.
Iha okaziaun ne’e mós, Ministru “Oan-Soru”, fó hanoin nafatin bá Kombatente sira atu lalika fiar ema ilegál sira ne’ebé agora dadauk sei la’o sirkula tun-sa’e iha baze hodi bosok husu osan bá Kombatente sira kona-bá rejístu atu hetan lalais pensaun Veteranu ninian.
Enkuantu, Kombatente sira ne’ebé rejistadu iha 2009, maibé oras ne’e mate ka fila ona bá mundu seluk, ninia feen ho oan sira mak iha direitu simu. Importante ema ne’e Kombatente duni no ho dedikasaun eskluziva ida ne’ebé loloos.
Eventu “Assinatura dos EDITAIS Dos Combatentes registados e validados no Segundo Registo de 2009”, iha Salão Três de Março Maubai, edifísiu nasionál MACLN Comoro Dili.(*/Smnews)
Komentariu