Xanana Simu Afiliantes Militante PLP, FRETILIN, KHUNTU No PD Hosi Delta Tres No Lahane Orientál

Smnewstl.com- DILI 04 Marsu FEVEREIRU 2023- Prezidente Partidu CNRT, Kay Rala Xanana Gusmão no Sekretariu Jerál, Fransisco Kalbuadi Lay kontinua simu afiliantes estrutura partidu politikus hosi i áres Delta Tres Komoro no Lahane Orientál Dili.

Afiliante sira ne’e mai hosi estrutura partidu FRETILIN, PLP, KHUNTU no PD ne’ebé deklara ho vontade prontu vota ba CNRT hodi hetan votória iha eleisaun parlamentar loron 21 Maiu 2023.

Koordenador Partidu PLP Postu Administrativu Laga, Munisipiu Baucua, Domingos Lamberto Belo ne’ebé hela iha área Delta deklara lori familia no kolega sira sai hosi PLP, tanba nota tinan lima governasaun Taur Matan Ruak no Mari Alkatiri la hatudu rezultadu ruma povu.

“Tinan lima ne’e ita la haree progresu ruma hosi dezenvolvimentu, infraestrutra barak aat governu abandona la hadia, tanba ne’e maun boot Xanana, ha’u hakarak deklara katak, ohin ami  mai hamutuk ida ne’e atu tau konfiansa ho votos lori fali maun boot Xanana fila fali ba ukun, no sei iha servisu boot ida ita suporta maun boot Xanana atu luta ba fronteira maritima,” dehan Domingos liu hosi deskursu iha Delta Tres, Komoro, Dili sabadu (04/03/23)

Nia lamenta durante tinan liman governu ida ne’e ukun, obra projetu barak maka aat no governu ida ne’e abandona hodi halo nasaun ne’e kontinua la’o iha risku oin-oin povu hasoru susar no terus no ekonomia Timor-Leste fraku.

“Ami mai, ami la husu previleziu ruma, maibé ami mai ho ami nia fuan no ami nia hakarak rasik, atu lori maun boot Xanana ba palasiu governu atu hadia ita nia rain no halo dezenvolvimentu sustentavel ba rai ida ne’e,” nia hatete.

Entretantu hafoin simu afiliantes iha Delta Tres, Xanana no Kalbuadi kontinua halo konsolidasaun iha Taibesi hodi simu mós afiliantes partidu politikus hosi, FRETILIN  KHUNTU no PD.

Koordenador Partidu CPN-PD Nain Feto nomos Eis Xefe Suku Lahane Oriental Fernando da Cruz lori membru na’in PD na’in-50, militate FRETILIN na’in-25 no PLP hakarak apoia CNRT, tanba nota katak, durante dezastre naturál iha loron 04 Abril 2020 akontese mota sobu povu nia uma, la iha lideransa ruma maka tun ba terenu hodi apoia povu, maibé haree de’it Xanana maka tun direita hodi ajuda vitima sira.

“Ami sai PD, no malu sira hosi FRETILIN no KHUNTU hakarka mai ho CNRT ho laran ho fuan, ami la vota ba partidu seluk, ami akompaña hela situasaun tinan 5 nia laran, ita haree labele, tanba ne’e ami orgnaiza malu ita nia votus entrega ba maun Xanan liu hosi partidu CNRT,” nia hatete.

Eis Xefe Suku Lahane Orinetál reafirma agora tenki akontes referendu dala ida tan, tanba referendu 1999 povu hotu- hotu vota ba CNRT maka lori Timor ba ukun aan.

“Agora ne’e referendun kedua maka ida ne’e duni, iha 1999 ami vota ba CNRT hodi ukun duni vizinu sira sai, agora vota CNRT atu lori rai no povu ne’e tenki moris di’ak,” nia afirma.

Iha fatin hanesan, Prezidente Partidu CNRT, Kay Rala Xanana Gusmão agradese, tanba militante partidu seluk akompaña sitasaun governu atuál ukun tinan lima mosu problema oin-oin deit.

“Ami agradese ba maluk sira ohin mai afilia ba CNRT, maibe labele hanoin katak, Partidu CNRT fera partidu sira seluk, ne’e la iha liu hanoin,” dehan Xanana

Xanana dehan, militante hirak ne’ebé desidi tama CNRT, tanba sira fiar CNRT iha vizaun no programa di’ak atu hadia rai ne’e.

Nia hatutan, partidu sira ne’ebé ukun agora la konsege hatudu sira nia planu atu rezolve problema ne’ebé povu hasoru. Tanba ne’e Xanana alerta ba afiliantes sira ho estrutura CNRT nasional too baze atu servisu makas hodi CNRT hetan kadeira 33 iha Parlamentu Nasionál.(smnews)