Xanana Mobiliza Escavator Normaliza Drainagen Iha Balide

SMNewstl Media Online -Lider Nacional, Kay Rala Xanana Gusmao nafatin dinamiza servisu popular iha Balide Dili maske la hola parte iha executivu.

Asaun husi Eis Presidente Republika ne’e kumpri ba pedido husi komunidade sira tamba iha tempu udan sempre lori sofrementu boot liliu lakon sasan uma laran ate balun to’o lakon uma.

Durante loron hat iha valeta koak Balide Dili, rezidente sira ho triste hakbesik aprezenta problema ne’ebe sira infrenta.

Xanana Gusmao ne’ebe rona preokupasaun halo kedas observasaun no identifika uma kain rua maka a’at total kauza husi udan boot iha loron 4 fulan Abril 2021.

Uma hirak ne’e risku tebes tamba besik kedas be’e dalan. Hare ba kondisaun ne’e, Xanana mobiliza kedas timoroan hirak ne’ebe iha kbit hodi apoio Escavator no Bascolante nune’e ajuda normaliza be’e dalan hodi la fo risku iha futuru.

Alfredo Mendounca, ne’ebe nia uma sofre estragus total agradese ba Kay Rala Xanana Gusmao tamba durante fulan tolu resin hela deit iha Escola 4 de Setembro.

Nia konsidera, maske vitima afeitado ba inundasaun integra hotu ona ba Bairo foun ne’ebe governo idenfika, maibe hanesan umana nafatin agradese ba Xanana Gusmao ne’ebe nafatin esforsu tau matan ba sira ne’ebe halaerik.

Filomena da Costa, ne’ebe mos afeitado husu ba parte kompotente atu aslera konstroi bairo foun nune’e sira bele ba hamahan a’an.

“Durante inundasaun ne’e, ami ba tia foho. Ami rona Avo Nana mai ne’e mak ami mos mai no hein katak bele hetan netik apoio ruma atu bele augbenta moris. Labarik sira iha hotu foho, sorti kovid-19, lae karik ami la hatene los atu ba hela iha nebe,”nia preokupa

Kay Rala Xanana Gusmao mobiliza servisu popular hahu kedas husi Tasi Tolu. Remata husi neba, Eis Komando da Luta ne’e deklara sei kontinua hare fila fali fatin seluk ne’ebe presiza nia tulun.

Asaun servisu popular ne’e rasik apoio masimu husi ekipa MBX hamutuk ho komunidade. (Rio)