Xanana Matawen Monu Bainhira Sarani Sira Foti Liman Tula Hodi Simu Bensaun

Smnewstl.com 05-11-2021 (Maubisse) – Líder Nacional, Kay Rala Xanana Gusmão Sexta-feira, (05-11-2021) kontinua desloka bá Suco Hohorai Ki’ik, Posto Administrativo Maubisi, Munisipio Ainaro hodi apoia aihan bá sidadaun vulnerável balun iha Suku refere.

Prezensa eis líder rezisténsia simu entuziasmu husi komunidade sira. Molok hahu atividade, dahuluk realiza misa agradesimente ka misa salvasaun bá Kay Rala Xanana Gusmão Iha Gruta Lebulau Hatusau, Suco Hohorai Ki’ik.

Iha omília, Amo Selebrante Frido Abel Quintão dehan, Xanana Gusmão hanesan líder exemplar ne’ebé presiza bánati tuir, tambá konsideradu atividade ne’ebé líder ne’e hala’o tuir kedas dalan Jesus Kristu.

“Avo nia prezensa justifika domin bo’ot mai ami, tan ne’e ita agradese bá domin ne’e. Maromak hatudu ona, maromak fo ona mai ita domin. Ita hot-hotu tenki hamutuk ho Avo Nana sai instrumentu ida de’it bá domin maromak nian, la’o fila fali hodi dezenvolve ita nia nasaun.

Padre Kongregasaun Kanossiana ne’e fundamenta, Xanana mak líder ida domin nain tambá nunka sente kolen bá buka tuir nia povu maske la’o iha loron laran, sa’e foho, tun foho no hakur mota.

“Avo Nana líder ida ne’ebé hadomi nia povu no hakarak diak bá nia povu. Tambá ne’e, ita hotu iha ne’e tenki laran ida de’it, hanoin ida de’it, hakarak ida de’it maka dezenvolve ita nia nasaun. Ida ne’e, se’e?mak bele halo, so katuas fuk mutin ida ne’ebé tur hela iha ita nia oin mak bele halo,” tenik Amo Frido.

Nia hatutan, timoroan tenki orgullu ho líder bo’ot hanesan Xanana Gusmão ne’ebé nunka sente kolen luta bá povu nia prosperu desde kedas lori rai ne’e bá hetan naroman nune’e ohin loron ita hotu mai hamrik hodi hasa’e agradese.

Bá esforsu ne’ebé oferese bá rai ne’e, antes hakotu, Amo Frido husu bá srani sira hotu foti liman tula iha Xanana Gusmão nia kotuk nudar sinal hodi husu salvasaun atu nai maromak kontinua haraik vida naruk nune’e dezenvolve rai ne’e.

Bainhira srani sira foti liman akompaña husi bensaun husi Amo Frido, Xanana Gusmão mós la augenta hodi hasai kedas matawen nudar sinal foun simu responsabilidade bá kontinuasaun servisu bá povu no nasaun.

Iha nia opirtunidade, Xanana Gusmão agradese bá srani sira hotu inklui Amo Frido ne’ebé fo biban selebra misa ida bá nia maske konsideradu nia prezensa lori de’it aihan oituan bá komunidade sira.

Hare bá matawen Xanana Gusmão nian, Amo Frido mós hakbesik hakoak hodi fo solidariedade no husu atu forca nafatin nune’e bele tau matan bá povu no nasaun.

Iha nia biban, Eis líder rezisténsia promete atu nafatin dinamiza servisu popular hodi tau matan bá povu tambá konsideradu nia parte mai husi povu nia oan.

Remata misa kontinua kedas ho asaun kariedade bá sidadaun vulnerável sira ne’ebé intrega simbolikamente husi Kay Rala Xanana Gusmão ho amo Frido.

Aihan hirak ne’e hetan husi Presidente Asosiasaun Cinesa Timor Leste, Ketleen Gonçalves.(rio)