Xanana: La Gava A’an, CNRT De’it Mak Iha Vizaun Bá Ukun

Smnewstl.com 29-10-2021 (Manatuto) – Prezidente Partidu Kongressu Nasionál Rekonstrusaun Timor (CNRT), Kay Rala Xanana Gusmão afirma, ejisténsia CNRT hodi fó solusaun bá problema rai laran liu-liu krize 2006, ne’ebé estadu la konsege rezolve iha momentu ne’ebá.

“Ita lembra katak, iha 2006, mosu krize, krize ne’ebé estadu la konsege rezolve maka ita hamutuk ho sira seluk harii CNRT, tamba ho CNRT maka 1999, deside futuru rai ne’e. Ha’u uluk, membru komité sentral FRETILIN, foin dadauk mate tan maun alin ida Mauhuno, membru komité antes funu 1975, iha 4 ou lima sei moris, maibé depois de baze apoiu rahun barak maka mate,” haktuir Xanana Gusmão hafoin simu apoiante sira iha Suku Cribas Munisípiu Manatuto sesta ne’e.

Eis lider rezistensia rekuinese, la matenek liu sira ne’ebé agora kaer ukun, maibé nia iha vizaun.

“Vizaun ne’e maka atu lori Timor ne’e bá ne’ebé, hanesan iha funu laran ho kilat 600 no kilat musan laiha, maibé konsege manan funu, ida ne’e maka hanaran vizaun,” Haktuir Xanana.

Nia hatutan, bainhira iha ona vizaun maka ita foin bele ko’alia misaun hodi lori dezenvolvimentu bá povu no nasaun.

“2007, CNRT mosu ho nia prioridade maka rezolve uluk konflitu, lakoi atu timoroan oho malu, hamutuk lolo liman hodi avansa bá dezenvolvimentu, tambá ne’e maka bainhira rezolve tiha krize ne’ebé akontese, ita avansa kedas ho adeus konflitu, bem-vindo Dezenvolvimentu,” haktuir Xanana.

Bá komunidade Suco Cribás, Posto Administrativo Manatuto Vila, Sexta-feira, (30-10-2021) báinhira simu tan sidadaun bálun ne’ebé voluntariamente deklara apoio bá Elisaun Presidensial no Parlamentar.

Xanana afirma, durante 2007-2016 la halo buat hotu, maibé hala’o tuir vizaun partidu CNRT nian, maske ohin loron simu krítika, maibé realidade maka povu bele sente eletresidade nia naroman, estrada, be’e moos no seluk tan.

“Ha’u husu de’it karik ha’u labele defende katak, husi 2007 mai 2015-2016 ne’e, ami halo buat barak, la’e, ami la halo ida, la halo liu, halo mak aat de’it. Husi 2017 mai agora, governu sira foun mesak matenek de’it halo ita haree dezenvolvimentu ne’e la’o, mais povu mak terus hela de’it, ne’ebé ha’u nia hakoak no domin tomak bá imi, maibé to’o iha ne’ebá ida-idak iha nia kakutak atu deside, laiha ema obriga ema ida, iha demokrasia nia laran,” deklara Xanana.

“Atu bá deside, imi mak hanoin tok bá haree tok bá dehan, husi 2007 mai to’o 2016 halo buat ruma ga la halo ga, 2017 to’o 2021 halo buat barak oinsá bu’at mesak di’ak de’it to’o iha ne’ebé hodi ida-idak bele deside hodi ita bele la’o bá oin,” apela nia.

Xanana deklara, maske la gabá a’an, maibé partido CNRT ne’ebé nia lidera iha vizaun no difirente ho partidu sira seluk.

“Buat ida ha’u bele dehan, partidu sira seluk ha’u haree tiha ona laiha vizaun, partidu ne’ebé ha’u reprezenta iha vizaun atu bá oin ne’e halo saida.? Ita labele halo bu’at hotu-hotu, maibé halo ho vizaun,” hatutan Xanana.(rio)